ಮುಜರಾಯಿ ಸಚಿವರಾಗಿ ರಾಮಲಿಂಗರೆಡ್ಡಿ ಅವರೇ ಮುಂದುವರೆಯಲಿ: ಸಿಎಂ, ಡಿಕೆಶಿಗೆ ರಾಜ್ಯ ಅರ್ಚಕರ ಸಂಘದ ಒಕ್ಕೊರಲ ಆಗ್ರಹ!

ಮುಜರಾಯಿ ಇಲಾಖೆಯಲ್ಲಿ ಐತಿಹಾಸಿಕ ಸುಧಾರಣೆಗಳನ್ನು ತಂದಿರುವ ಹಾಗೂ ದೇವಸ್ಥಾನಗಳ ಸಾವಿರಾರು ಎಕರೆ ಒತ್ತುವರಿ ಜಾಗವನ್ನು ತೆರವುಗೊಳಿಸಿರುವ ರಾಮಲಿಂಗರೆಡ್ಡಿ ಅವರನ್ನೇ ಮುಜರಾಯಿ ಸಚಿವರನ್ನಾಗಿ ಮುಂದುವರಿಸುವಂತೆ ರಾಜ್ಯ ಅರ್ಚಕರ ಸಂಘ ಒತ್ತಾಯಿಸಿದೆ. ಸಂಪೂರ್ಣ ವರದಿ ಇಲ್ಲಿದೆ…

ಮುಜರಾಯಿ ಸಚಿವರಾಗಿ ರಾಮಲಿಂಗರೆಡ್ಡಿ ಅವರೇ ಮುಂದುವರೆಯಲಿ: ಸಿಎಂ, ಡಿಕೆಶಿಗೆ ರಾಜ್ಯ ಅರ್ಚಕರ ಸಂಘದ ಒಕ್ಕೊರಲ ಆಗ್ರಹ!

ಬೆಂಗಳೂರು: ರಾಜ್ಯ ಮುಜರಾಯಿ ಇಲಾಖೆಯ ಇತಿಹಾಸದಲ್ಲೇ ಹಿಂದೆಂದೂ ಕಾಣದಂತಹ ಅಭಿವೃದ್ಧಿ ಕಾರ್ಯಗಳನ್ನು ಹಾಗೂ ಧಾರ್ಮಿಕ ಕೇಂದ್ರಗಳಿಗೆ ಅಗತ್ಯ ಸೌಲಭ್ಯಗಳನ್ನು ಕಲ್ಪಿಸಿಕೊಟ್ಟಿರುವ ಹಿರಿಯ ನಾಯಕ ರಾಮಲಿಂಗರೆಡ್ಡಿ ಅವರನ್ನೇ ಮುಜರಾಯಿ ಸಚಿವರನ್ನಾಗಿ ಮುಂದುವರಿಸಬೇಕು ಎಂದು ‘ಕರ್ನಾಟಕ ರಾಜ್ಯ ಮುಜರಾಯಿ ದೇವಾಲಯಗಳ ಅರ್ಚಕರ, ಆಗಮಿಕರ ಮತ್ತು ನೌಕರರ ಸಂಘ’ವು ರಾಜ್ಯ ಸರ್ಕಾರವನ್ನು ಒಕ್ಕೊರಲಿನಿಂದ ಆಗ್ರಹಿಸಿದೆ…

ಬುಧವಾರ ನಗರದ ಖಾಸಗಿ ಹೋಟೆಲ್‌ನಲ್ಲಿ ಆಯೋಜಿಸಲಾಗಿದ್ದ ವಿಶೇಷ ಸುದ್ದಿಗೋಷ್ಠಿಯಲ್ಲಿ ಸಂಘದ ಅಧ್ಯಕ್ಷರಾದ ಆಗಮ ವಿದ್ವಾನ್ ಶ್ರೀವತ್ಸ ಅವರು ಮಾತನಾಡಿ, ಮುಜರಾಯಿ ಸಚಿವರಾಗಿ ರಾಮಲಿಂಗರೆಡ್ಡಿ ಅವರು ಕೈಗೊಂಡಿರುವ ದಿಟ್ಟ ನಿರ್ಧಾರಗಳು ಹಾಗೂ ಅರ್ಚಕರ ಪರವಾದ ಕಾಳಜಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು..

ದೇವರ ಕುರಿತು ಅಪಾರ ಆಸ್ಥೆ ಹೊಂದಿರುವ ನಾಯಕ

ರಾಮಲಿಂಗರೆಡ್ಡಿ ಅವರು ಸತತ 8 ಬಾರಿ ಶಾಸಕರಾಗಿ ಆಯ್ಕೆಯಾಗಿದ್ದು, ಹಲವು ಬಾರಿ ಸಚಿವರಾಗಿ ಸೇವೆ ಸಲ್ಲಿಸಿದ ಅಪಾರ ಆಡಳಿತಾತ್ಮಕ ಅನುಭವ ಹೊಂದಿದ್ದಾರೆ. ಮುಜರಾಯಿ ಸಚಿವರಾದ ಬಳಿಕ ಅವರು ದೇವಸ್ಥಾನಗಳ ಒತ್ತುವರಿ ಜಾಗವನ್ನು ನಿರ್ದಾಕ್ಷಿಣ್ಯವಾಗಿ ತೆರವು ಮಾಡಲು ಹಗಲಿರುಳು ಶ್ರಮ ವಹಿಸಿದ್ದಾರೆ. ದೈವಭಕ್ತಿ ಹಾಗೂ ದೇವಾಲಯಗಳ ಕುರಿತು ಅವರಿಗೆ ಅಪಾರವಾದ ಆಸ್ಥೆಯಿದೆ. ಈ ಹಿನ್ನೆಲೆಯಲ್ಲಿ ಅವರನ್ನೇ ಸಚಿವರನ್ನಾಗಿ ಮುಂದುವರಿಸುವಂತೆ ಶೀಘ್ರದಲ್ಲೇ ಮುಖ್ಯಮಂತ್ರಿಗಳಿಗೆ ಖುದ್ದಾಗಿ ಭೇಟಿಯಾಗಿ ಮನವಿ ಸಲ್ಲಿಸಲಿದ್ದೇವೆ, ಎಂದು ಆಗಮ ವಿದ್ವಾನ್ ಶ್ರೀವತ್ಸ ತಿಳಿಸಿದರು.

ಬೀದಿಗೆ ಬಂದಿದ್ದ ಅರ್ಚಕರ ಕಷ್ಟಕ್ಕೆ ಸ್ಪಂದಿಸಿದ ಏಕೈಕ ಸಚಿವ!

ಸುದ್ದಿಗೋಷ್ಠಿಯಲ್ಲಿ ಹಿಂದಿನ ಸರ್ಕಾರಗಳ ನಿರ್ಲಕ್ಷ್ಯವನ್ನು ಸ್ಮರಿಸಿದ ಶ್ರೀವತ್ಸ ಅವರು, “ಹಿಂದಿನ ಯಾವುದೇ ಮುಜರಾಯಿ ಸಚಿವರುಗಳು ಅರ್ಚಕರ ಕಷ್ಟ-ಕಾರ್ಪಣ್ಯಗಳ ಕುರಿತು ಕಾಳಜಿ ವಹಿಸಿರಲಿಲ್ಲ. ‘ಉಳುವವನೇ ಭೂಮಿಯ ಒಡೆಯ’ ಕಾಯ್ದೆ ಜಾರಿಯಾದ ಬಳಿಕ ಸಾವಿರಾರು ಎಕರೆ ಭೂಮಿಯನ್ನು ಕಳೆದುಕೊಂಡ ಅರ್ಚಕರು ಅಕ್ಷರಶಃ ಬೀದಿಗೆ ಬಂದಿದ್ದರು. ಸರ್ಕಾರ ನೀಡುತ್ತಿದ್ದ ತಸ್ತಿಕ್ ಹಣ ಬಿಟ್ಟರೆ ಬೇರೆ ಯಾವುದೇ ಆದಾಯವಿರಲಿಲ್ಲ. ಅಂದಿನಿಂದ ಇಂದಿನವರೆಗೂ ಯಾರೊಬ್ಬರೂ ನಮ್ಮ ನೆರವಿಗೆ ಬರಲಿಲ್ಲ. ಆದರೆ, ಸಚಿವ ರಾಮಲಿಂಗರೆಡ್ಡಿ ಅವರು ಇದಕ್ಕೆ ತದ್ವಿರುದ್ಧವಾಗಿ ನಮ್ಮೆಲ್ಲಾ ಮನವಿಗಳಿಗೆ ತಕ್ಷಣ ಸ್ಪಂದಿಸಿ, ಅರ್ಚಕರಿಗೆ ಸಾಕಷ್ಟು ಸವಲತ್ತುಗಳನ್ನು ಒದಗಿಸಿಕೊಟ್ಟಿದ್ದಾರೆ,” ಎಂದು ಕೃತಜ್ಞತೆ ವ್ಯಕ್ತಪಡಿಸಿದರು.

ರಾಮಲಿಂಗರೆಡ್ಡಿ ಅವಧಿಯ ಐತಿಹಾಸಿಕ ಸಾಧನೆಗಳು

ಸಂಘಟನಾ ಕಾರ್ಯದರ್ಶಿ ಡಾ. ಎನ್. ಮಂಜುನಾಥ್ ದೀಕ್ಷಿತ್ ಅವರು ಮಾತನಾಡಿ, ಸಚಿವರ ಅಧಿಕಾರಾವಧಿಯಲ್ಲಿ ನಡೆದ ಪ್ರಮುಖ ಮೈಲಿಗಲ್ಲುಗಳನ್ನು ವಿವರಿಸಿದರು:

• ಧಾರ್ಮಿಕ ಸೌಧ ನಿರ್ಮಾಣ: ವಿಧಾನಸೌಧದ ಎಂ.ಎಸ್. ಬಿಲ್ಡಿಂಗ್ ಎದುರುಗಡೆ ಇರುವ ಮುಜರಾಯಿ ಇಲಾಖೆಯ ಅತ್ಯಮೂಲ್ಯ ಜಾಗದಲ್ಲಿ ಬೃಹತ್ ‘ಧಾರ್ಮಿಕ ಸೌಧ’ ನಿರ್ಮಾಣ ಮಾಡಲು ಶಂಕುಸ್ಥಾಪನೆ ನೆರವೇರಿಸಿದ ಕೀರ್ತಿ ರಾಮಲಿಂಗರೆಡ್ಡಿ ಅವರಿಗೆ ಸಲ್ಲುತ್ತದೆ.
• ಕಡಲೇಕಾಯಿ ಪರಿಷೆಗೆ ಮೆರುಗು: ಬಸವನಗುಡಿಯ ಐತಿಹಾಸಿಕ ಬಸವಣ್ಣ ದೇವರ ಕಡಲೇಕಾಯಿ ಪರಿಷೆಯನ್ನು ಹೆಚ್ಚು ದಿನಗಳ ಕಾಲ ನಡೆಸಲು ಅಧಿಕೃತ ಆದೇಶ ಹೊರಡಿಸಿ, ಲಕ್ಷಾಂತರ ಭಕ್ತರು ದೇವರ ದರ್ಶನ ಪಡೆಯಲು ಅನುಕೂಲ ಮಾಡಿಕೊಟ್ಟಿದ್ದಾರೆ.
• ಜಿರ್ಣೋದ್ಧಾರ ಮತ್ತು ತ್ರಿಕಾಲ ಪೂಜೆ: ರಾಜ್ಯಾದ್ಯಂತ ಶಿಥಿಲಾವಸ್ಥೆಯಲ್ಲಿದ್ದ ನೂರಾರು ದೇವಾಲಯಗಳ ಜೀರ್ಣೋದ್ಧಾರಕ್ಕೆ ವಿಶೇಷ ಅನುದಾನ ಬಿಡುಗಡೆ ಮಾಡಿ, ಅಲ್ಲಿ ನಿರಂತರವಾಗಿ ‘ತ್ರಿಕಾಲ ಪೂಜೆ’ ನಡೆಯಲು ಕಾರಣೀಭೂತರಾಗಿದ್ದಾರೆ.
• ದೇವಸ್ಥಾನದ ಹೆಸರಿಗೆ ಜಮೀನು ಖಾತೆ: ಸಾವಿರಾರು ಎಕರೆ ಅತಿಕ್ರಮಿತ ಜಮೀನನ್ನು ದೇವಸ್ಥಾನದ ವಶಕ್ಕೆ ಪಡೆದು, ನೇರವಾಗಿ ದೇವರ ಹೆಸರಿಗೇ ಖಾತೆ-ಪಹಣಿ ಮಾಡಿಸಿ ಇತಿಹಾಸ ನಿರ್ಮಿಸಿದ್ದಾರೆ.

ವರಿಷ್ಠರಿಗೆ ಹಾಗೂ ಸಿಎಂಗೆ ನೇರ ಒತ್ತಾಯ

“ರಾಮಲಿಂಗರೆಡ್ಡಿಯವರ ಆಡಳಿತದ ಅವಧಿಯಲ್ಲಿ ಇಲಾಖೆಗೆ ಮತ್ತು ಸರ್ಕಾರಕ್ಕೆ ಅತ್ಯಂತ ಒಳ್ಳೆಯ ಹೆಸರು ಬಂದಿದೆ. ಅರ್ಚಕರ ಮತ್ತು ದೇವಾಲಯಗಳ ಅನೇಕ ಸಮಸ್ಯೆಗಳು ಇನ್ನೂ ಬಗೆಹರಿಯಬೇಕಿದೆ. ಈ ಅಪೂರ್ಣ ಕಾರ್ಯಗಳು ಪೂರ್ಣಗೊಳ್ಳಲು ಅವರಂತಹ ಕ್ರಿಯಾಶೀಲ ನಾಯಕರೇ ಈ ಸ್ಥಾನದಲ್ಲಿರಬೇಕು. ಆದ್ದರಿಂದ ಮುಂದೆಯೂ ಅವರಿಗೆ ಉನ್ನತ ಖಾತೆಯ ಜೊತೆಗೆ ಮುಜರಾಯಿ ಖಾತೆಯನ್ನೂ ನೀಡಬೇಕು ಎಂದು ಮುಖ್ಯಮಂತ್ರಿಗಳು ಹಾಗೂ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಮತ್ತು ಕಾಂಗ್ರೆಸ್ ವರಿಷ್ಠರಲ್ಲಿ ನಾವು ಒಕ್ಕೊರಲಿನಿಂದ ಆಗ್ರಹಿಸುತ್ತೇವೆ,” ಎಂದು ಡಾ. ಎನ್. ಮಂಜುನಾಥ್ ದೀಕ್ಷಿತ್ ತಿಳಿಸಿದರು.

ಈ ಮಹತ್ವದ ಸುದ್ದಿಗೋಷ್ಠಿಯಲ್ಲಿ ಸಂಘದ ಜಂಟಿ ಕಾರ್ಯದರ್ಶಿ ಕೆ.ವಿ. ಸುರೇಶ್ ಮೂರ್ತಿ, ರಾಜ್ಯ ಸಂಚಾಲಕ ಹೆಚ್.ಎಸ್. ಗುರು ದೀಕ್ಷಿತ್, ಖಜಾಂಚಿ ಡಾ. ಬಿ.ಕೆ. ರಾಮಚಂದ್ರ, ಹಾಗೂ ಪ್ರಮುಖ ನಿರ್ದೇಶಕರುಗಳಾದ ಕೆ.ಎನ್. ವಿಜಯೇಂದ್ರ ಕುಮಾರ್, ಎನ್. ಮಹದೇವಸ್ವಾಮಿ, ಬಸವರಾಜು, ಕೆ.ಎಸ್. ಸುಧಾಕರ್ ದೀಕ್ಷಿತ್, ಮಲ್ಲಿಕಾರ್ಜುನ್ ಸೇರಿದಂತೆ ಹಲವು ಪದಾಧಿಕಾರಿಗಳು ಉಪಸ್ಥಿತರಿದ್ದರು..

ಸನತ್ ದೇಸಾಯಿ

ಸನತ್ ದೇಸಾಯಿ ಅವರು ನಮ್ಮ ಜಾಲತಾಣದ ಬೆಂಗಳೂರು ವಿಭಾಗದ ವರದಿಗಾರರಾಗಿದ್ದಾರೆ. ಇವರು ಬಿಐಇಟಿ (BIET) ಯಿಂದ ಮೆಕ್ಯಾನಿಕಲ್ ಎಂಜಿನಿಯರಿಂಗ್ (B.E) ಹಾಗೂ ಕೆಎಸ್‌ಒಯು (KSOU) ನಿಂದ ಎಂ.ಎ (ಪತ್ರಿಕೋದ್ಯಮ) ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಕಳೆದ 7 ವರ್ಷಗಳಿಂದ ಫೀಲ್ಡ್ ಜರ್ನಲಿಸಂನಲ್ಲಿ ಸೇವೆ ಸಲ್ಲಿಸುತ್ತಿರುವ ಇವರು, ಈ ಹಿಂದೆ ‘ಈಟಿವಿ ಭಾರತ್’ (ETV Bharat) ನಲ್ಲಿ ಅಪರಾಧ, ರಾಜಕೀಯ, ವಿಜ್ಞಾನ-ತಂತ್ರಜ್ಞಾನ ಮತ್ತು ಸಿನಿಮಾ ವಿಭಾಗಗಳಲ್ಲಿ ವ್ಯಾಪಕ ವರದಿಗಾರಿಕೆ ಮಾಡಿದ ಅನುಭವ ಹೊಂದಿದ್ದಾರೆ. ಪ್ರಸ್ತುತ ನೃಪತುಂಗ ವಿಶ್ವವಿದ್ಯಾಲಯದಲ್ಲಿ ಕುಲಪತಿಗಳ ಆಪ್ತ ಕಾರ್ಯದರ್ಶಿ ಮತ್ತು ಸಾರ್ವಜನಿಕ ಸಂಪರ್ಕಾಧಿಕಾರಿಯಾಗಿ (PRO) ಕೂಡ ಸೇವೆ ಸಲ್ಲಿಸುತ್ತಿದ್ದಾರೆ.