ಪೊಲೀಸರ ನಡವಳಿಕೆಗೆ ಹೊಸ ಮಾರ್ಗಸೂಚಿ ಪ್ರಕಟ.! ಸಾರ್ವಜನಿಕರೊಂದಿಗೆ ವರ್ತಿಸಲು ಸರ್ಕಾರದ ಸುತ್ತೋಲೆ 

ರಾಜ್ಯದಲ್ಲಿ ಪೊಲೀಸ್ ಇಲಾಖೆ(Police Department) ಸಾರ್ವಜನಿಕರ ಭದ್ರತೆ, ಕಾನೂನು ಮತ್ತು ಸುವ್ಯವಸ್ಥೆ ಕಾಯ್ದುಕೊಳ್ಳುವ ಪ್ರಮುಖ ಅಂಶವಾಗಿದ್ದರೂ, ಇತ್ತೀಚಿನ ದಿನಗಳಲ್ಲಿ ಕೆಲವು ಪೊಲೀಸ್ ಸಿಬ್ಬಂದಿಗಳ ವರ್ತನೆ ಕುರಿತು ಅಸಮಾಧಾನ ವ್ಯಕ್ತವಾಗುತ್ತಿದೆ. ಕೆಲ ಸಂದರ್ಭಗಳಲ್ಲಿ ಸಾರ್ವಜನಿಕರ ಮೇಲೆ ದರ್ಪ, ಹಲ್ಲೆ ಅಥವಾ ಅನಾವಶ್ಯಕ ಧಮ್ಕಿ ನೀಡಿರುವ ಘಟನೆಗಳು ಸಾಮಾಜಿಕ ಮಾಧ್ಯಮಗಳಲ್ಲೂ, ಪತ್ರಿಕೆಗಳಲ್ಲೂ ಚರ್ಚೆಗೆ ಗ್ರಾಸವಾಗಿವೆ. ಈ ಹಿನ್ನೆಲೆಯಲ್ಲಿ, ರಾಜ್ಯದ ಪೊಲೀಸ್ ಇಲಾಖೆಯ ಮೇಲಿನ ವಿಶ್ವಾಸವನ್ನು ಪುನರುಜ್ಜೀವನಗೊಳಿಸಲು ಹಾಗೂ ಪೊಲೀಸರ ನಡವಳಿಕೆಯಲ್ಲಿ ಶಿಸ್ತಿನ ಜೊತೆಗೆ ಸೌಜನ್ಯವನ್ನು ಒತ್ತಿ ಹೇಳಲು ಡಿಜಿ ಮತ್ತು ಐಜಿಪಿ ಎಂ.ಎ. ಸಲೀಂ ಅವರು ಹೊಸ ಸುತ್ತೋಲೆಯನ್ನು ಹೊರಡಿಸಿದ್ದಾರೆ. ಇದೇ ರೀತಿಯ ಎಲ್ಲಾ ಮಾಹಿತಿಗೆ ನಮ್ಮ ಟೆಲಿಗ್ರಾಂ ಚಾನೆಲ್ ಗೆ ಈ ಕೂಡಲೇ ಜಾಯಿನ್ ಆಗಲು ಇಲ್ಲಿ ಕ್ಲಿಕ್ ಮಾಡಿ

ಈ ಸುತ್ತೋಲೆಯ ಉದ್ದೇಶ, ಪೊಲೀಸ್ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಜನರೊಂದಿಗೆ ಹೆಚ್ಚು ಮೃದುವಾಗಿ, ಕಾನೂನುಬದ್ಧವಾಗಿ ಮತ್ತು ಮಾನವೀಯತೆ ಆಧಾರಿತವಾಗಿ ವರ್ತಿಸುವಂತೆ ಮಾಡುವುದಾಗಿದೆ. ಪೊಲೀಸ್ ಇಲಾಖೆಯ ಪ್ರತಿ ಸದಸ್ಯರು ಜನರ ಕಣ್ಣಲ್ಲಿ ವಿಶ್ವಾಸಾರ್ಹತೆ, ಪಾರದರ್ಶಕತೆ ಮತ್ತು ಸಹಾನುಭೂತಿಯ ಪ್ರತಿರೂಪವಾಗಿರಬೇಕು ಎಂಬ ದೃಷ್ಟಿಕೋನದಿಂದ ಈ ಮಾರ್ಗಸೂಚಿ ರೂಪಿಸಲಾಗಿದೆ.

ಸುತ್ತೋಲೆಯ ಪ್ರಮುಖ ಅಂಶಗಳು ಹೀಗಿವೆ:

ಪಾರದರ್ಶಕತೆ ಮತ್ತು ಸಮಾನತೆ:
ಪೊಲೀಸ್‌ ಠಾಣೆಗೆ ಬರುವ ಯಾವುದೇ ವ್ಯಕ್ತಿಯ ಹಿನ್ನೆಲೆ, ಸಾಮಾಜಿಕ ಸ್ಥಾನ ಅಥವಾ ರಾಜಕೀಯ ಪ್ರಭಾವವನ್ನು ಪರಿಗಣಿಸದೆ ಎಲ್ಲರನ್ನೂ ಸಮಾನವಾಗಿ ಗೌರವದಿಂದ ವರ್ತಿಸಬೇಕು. ಕಾರ್ಯವಿಧಾನಗಳಲ್ಲಿ ಪಾರದರ್ಶಕತೆಯು ಇಲಾಖೆಯ ವಿಶ್ವಾಸಾರ್ಹತೆಯನ್ನು ಹೆಚ್ಚಿಸುತ್ತದೆ.

ದೂರುಗಳ ಸ್ವೀಕೃತಿಯಲ್ಲಿ ತಾಳ್ಮೆ:
ಸಾರ್ವಜನಿಕರ ಕುಂದುಕೊರತೆಗಳನ್ನು ತಾಳ್ಮೆಯಿಂದ ಆಲಿಸಿ, ಕಾನೂನಿನ ಪ್ರಕಾರ ತಕ್ಷಣದ ಕ್ರಮ ಕೈಗೊಳ್ಳಬೇಕು. ದೂರು ದಾಖಲಿಸುವಲ್ಲಿ ಕಾಲವಿಳಂಬ ಅಥವಾ ಕಾರಣರಹಿತ ನಿರಾಕರಣೆ ನಡೆಯಬಾರದು.

ಸಂವಹನದಲ್ಲಿ ಸೌಜನ್ಯ:
ಜನರೊಂದಿಗೆ ಮಾತನಾಡುವಾಗ ಒರಟು ಭಾಷೆ ಅಥವಾ ದರ್ಪದ ಧ್ವನಿ ಉಪಯೋಗಿಸಬಾರದು. ಎಲ್ಲ ಸಂದರ್ಭದಲ್ಲೂ ಸೌಜನ್ಯ ಮತ್ತು ಘನತೆಯುಳ್ಳ ಮಾತುಗಳಿಂದಲೇ ಸಂಪರ್ಕ ಸಾಧಿಸಬೇಕು.

ನೈತಿಕತೆ ಜೊತೆ ಪ್ರಾಮಾಣಿಕತೆ ಕೂಡ ಮುಖ್ಯ:
ಯಾವುದೇ ವ್ಯಕ್ತಿ ಅಥವಾ ಸಂಸ್ಥೆಯಿಂದ ಅಕ್ರಮ ಲಾಭ, ಉಡುಗೊರೆ ಅಥವಾ ಸಹಾಯ ಸ್ವೀಕರಿಸುವುದರಿಂದ ಸಂಪೂರ್ಣವಾಗಿ ದೂರವಿರಬೇಕು. ಕರ್ತವ್ಯದಲ್ಲಿ ಮತ್ತು ಅದರ ನಂತರವೂ ನೈತಿಕ ಮೌಲ್ಯಗಳನ್ನು ಪಾಲಿಸಿ ಇಲಾಖೆಗೆ ಮಾದರಿಯಾಗಬೇಕು.

ತನಿಖೆಯಲ್ಲಿ ಪಾರದರ್ಶಕತೆ:
ಪ್ರತಿ ಪ್ರಕರಣದ ದಾಖಲೆಗಳು, ತನಿಖಾ ಪ್ರಕ್ರಿಯೆಗಳು ನಿಖರವಾಗಿರಬೇಕು. ಸ್ಟೇಷನ್ ಹೌಸ್ ಡೈರಿಗಳು ಹಾಗೂ ಕೇಸ್ ಫೈಲ್‌ಗಳಲ್ಲಿ ಸಮಗ್ರ ದಾಖಲೆಗಳನ್ನು ನಿರ್ವಹಿಸಬೇಕು.

ಅಧಿಕಾರ ದುರುಪಯೋಗ ಮಾಡಿಕೊಳ್ಳಬಾರದು:

ಯಾವುದೇ ನಾಗರಿಕರಿಗೆ ಅನಗತ್ಯ ತೊಂದರೆ ನೀಡುವುದು, ಅಧಿಕಾರದ ದುರುಪಯೋಗ ಮಾಡುವುದು ಅಥವಾ ದೌರ್ಜನ್ಯ ತೋರಿಸುವುದು ಇಲಾಖೆಯ ಘನತೆಗೆ ಧಕ್ಕೆಯಾಗಿದೆ ಎಂದು ಸುತ್ತೋಲೆಯಲ್ಲಿ ಎಚ್ಚರಿಕೆ ನೀಡಲಾಗಿದೆ.

ಮಹಿಳೆಯರು, ಹಿರಿಯರು, ಮಕ್ಕಳಿಗೆ ವಿಶೇಷ ಕಾಳಜಿ:

ಮಹಿಳೆಯರ ವಿಚಾರಣೆಯನ್ನು ಸಂಜೆ 6 ಗಂಟೆಯ ನಂತರ ಠಾಣೆಗೆ ಕರೆತರುವುದಿಲ್ಲ. ಮಹಿಳಾ ಅಧಿಕಾರಿಯ ಸಮ್ಮುಖದಲ್ಲೇ ವಿಚಾರಣೆ ನಡೆಯಬೇಕು. ಮಹಿಳಾ ಆರೋಪಿಗಳನ್ನು ಠಾಣೆಯಲ್ಲಿ ಇರಿಸದೆ ರಾಜ್ಯ ಗೃಹ ಆಶ್ರಯ ಕೇಂದ್ರಗಳಲ್ಲಿ ಇರಿಸಬೇಕು.

ವೃತ್ತಿಪರತೆ ಬಹಳ ಮುಖ್ಯ:

ಪೊಲೀಸ್ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಸದಾ ನೀಟಾದ ಸಮವಸ್ತ್ರದಲ್ಲಿ ಇರಬೇಕು. ಇದು ವೃತ್ತಿಪರತೆ, ಶಿಸ್ತಿನ ಮತ್ತು ಇಲಾಖೆಯ ಗೌರವದ ಪ್ರತೀಕ.

ತಂತ್ರಜ್ಞಾನ ಮತ್ತು ಬಾಡಿ ಕ್ಯಾಮೆರಾ ಬಳಕೆ:

ಸಾರ್ವಜನಿಕರೊಂದಿಗೆ ಸಂವಹನದಲ್ಲಿ ನ್ಯಾಯಸಮ್ಮತತೆಯನ್ನು ಕಾಯ್ದುಕೊಳ್ಳಲು ಸಮವಸ್ತ್ರದ ಮೇಲೆ ಧರಿಸುವ ಕ್ಯಾಮೆರಾಗಳನ್ನು ಜವಾಬ್ದಾರಿಯುತವಾಗಿ ಬಳಸಬೇಕು. ಇದು ತನಿಖಾ ಪಾರದರ್ಶಕತೆಯುಳ್ಳ ನಡವಳಿಕೆಗೆ ಸಹಕಾರಿ ಎಂದು ಹೇಳಲಾಗಿದೆ.

ಮಹಿಳೆಯರ ಗೌರವ ಮತ್ತು ಸುರಕ್ಷತೆ:

ಮಹಿಳೆಯರ ವಿಚಾರಣೆ ಅಥವಾ ಬಂಧನದ ವೇಳೆ ಯಾವುದೇ ಅವಮಾನಕಾರಿ ಘಟನೆ ನಡೆಯದಂತೆ ನೋಡಿಕೊಳ್ಳಬೇಕು. ಮಾನವೀಯತೆ, ಗೌರವ ಮತ್ತು ಕಾನೂನುಸಮ್ಮತ ಕ್ರಮವನ್ನು ಪಾಲಿಸಬೇಕು.

ಸಾರ್ವಜನಿಕ ವಿಶ್ವಾಸಕ್ಕೆ ಪ್ರಾಮುಖ್ಯತೆ:

ಡಿಜಿ–ಐಜಿಪಿ ಸಲೀಂ ಅವರ ಮಾರ್ಗಸೂಚಿಯಲ್ಲಿ ಪೊಲೀಸ್ ಇಲಾಖೆಯ ನಿಜವಾದ ಶಕ್ತಿ ಜನರ ವಿಶ್ವಾಸದಲ್ಲಿದೆ ಎಂದು ಸ್ಪಷ್ಟವಾಗಿ ಉಲ್ಲೇಖಿಸಲಾಗಿದೆ. ಪೊಲೀಸ್ ಅಧಿಕಾರಿಗಳು ಜನರೊಂದಿಗೆ ಪಾರದರ್ಶಕವಾಗಿ ವರ್ತಿಸಿದಾಗ, ಕಾನೂನು ಪಾಲನೆಯ ಪ್ರಕ್ರಿಯೆ ಸುಗಮವಾಗುತ್ತದೆ ಮತ್ತು ಸಮಾಜದಲ್ಲಿ ಪೊಲೀಸರ ಬಗ್ಗೆ ಗೌರವ ಮತ್ತು ನಂಬಿಕೆ ಹೆಚ್ಚುತ್ತದೆ.

ಈ ಸುತ್ತೋಲೆ ಕೇವಲ ಆಂತರಿಕ ನಿಯಮಾವಳಿ ಅಲ್ಲ, ಇದು ರಾಜ್ಯದ ಪೊಲೀಸ್ ಇಲಾಖೆಯ ಜನಾಭಿಮಾನಿ ಪರಿವರ್ತನೆಗೆ ಒಂದು ಮಾರ್ಗ. ಜನರ ಹಕ್ಕುಗಳಿಗೆ ಗೌರವ ನೀಡುವುದು, ಸಂಯಮದಿಂದ ವರ್ತಿಸುವುದು, ಪಾರದರ್ಶಕತೆ ಮತ್ತು ನಿಷ್ಠೆಯಿಂದ ಕೆಲಸ ಮಾಡುವುದು   ಮಾರ್ಗಸೂಚಿಯ ಮುಖ್ಯ ಅಂಶಗಳು.

ಈ ಮಾಹಿತಿಗಳನ್ನು ಓದಿ

ದಯವಿಟ್ಟು ಗಮನಿಸಿ: ನೀಡ್ಸ್ ಆಫ್ ಪಬ್ಲಿಕ್ ತನ್ನ ಓದುಗರಿಗೆ ನಿಖರವಾದ ಮತ್ತು ಅಧಿಕೃತ ಮಾಹಿತಿಗಳನ್ನು ಮಾತ್ರ ಪ್ರಕಟಿಸುತ್ತದೆ. ಇಲ್ಲಿ ನಾವು ಯಾವುದೇ ಅನಧಿಕೃತ ಮತ್ತು ಸುಳ್ಳು ಮಾಹಿತಿಯನ್ನು ಬಿತ್ತರಿಸುವುದಿಲ್ಲ.