ಮಾವಿನ ಹಣ್ಣು ಖರೀದಿ ಮುನ್ನ: ನೈಸರ್ಗಿಕ vs ಕಾರ್ಬೈಡ್ ಮಾವು ಗುರುತಿಸುವುದು ಹೇಗೆ? 4 ಸರಳ ಟಿಪ್ಸ್

ಬೇಸಿಗೆ ಬಂತೆಂದು ಆಕರ್ಷಕ ಬಣ್ಣದ ಮಾವಿನ ಹಣ್ಣುಗಳನ್ನು ಖರೀದಿಸುತ್ತಿದ್ದೀರಾ? ಕೃತಕವಾಗಿ ಮಾಗಿಸಲು ಬಳಸುವ ‘ಕ್ಯಾಲ್ಸಿಯಂ ಕಾರ್ಬೈಡ್’ ಎಂಬ ವಿಷದ ಬಗ್ಗೆ ಎಚ್ಚರವಿರಲಿ. ಸಂಪೂರ್ಣ ಮಾಹಿತಿ ಇಲ್ಲಿದೆ.

ಬೇಸಿಗೆ ಕಾಲ ಬಂತೆಂದರೆ ಸಾಕು, ಮಾರುಕಟ್ಟೆಯಲ್ಲಿ ಹಣ್ಣುಗಳ ರಾಜ ‘ಮಾವು’ ಘಮಘಮಿಸಲು ಶುರುವಾಗುತ್ತದೆ. ರಸ್ತೆಯ ಬದಿಯಲ್ಲಿ, ಗಾಡಿಗಳಲ್ಲಿ ಅಚ್ಚ ಹಳದಿ ಬಣ್ಣದ, ನೋಡಿದ ತಕ್ಷಣ ಬಾಯಲ್ಲಿ ನೀರೂರಿಸುವ ಮಾವಿನ ಹಣ್ಣುಗಳು, ಬಾಳೆಹಣ್ಣು ಮತ್ತು ಪಪ್ಪಾಯಿಗಳು ಕಣ್ಣಿಗೆ ರಾಚುತ್ತವೆ. ಅಬ್ಬಾ, ನೋಡೋಕೆ ಎಷ್ಟೊಂದು ಚೆನ್ನಾಗಿದೆ, ಸಕತ್ ಸ್ವೀಟ್ ಆಗಿರಬಹುದು ಎಂದುಕೊಂಡು ನಾವೂ ಕೂಡ ಚೌಕಾಸಿ ಮಾಡಿ ಮನೆಗೆ ತರುತ್ತೇವೆ. ಆದರೆ, ಆಕರ್ಷಕ ಬಣ್ಣದ ಹಿಂದೆ ಅಡಗಿರುವ ‘ಮಸಾಲಾ’ದ ಕರಾಳ ಸತ್ಯ ಗೊತ್ತಾದರೆ ನೀವು ಹಣ್ಣು ತಿನ್ನುವುದನ್ನೇ ಬಿಡಬಹುದು!

ಹೌದು, ಮಾರುಕಟ್ಟೆಯಲ್ಲಿ ಈಗ ಸಹಜವಾಗಿ ಮಾಗಿದ ಹಣ್ಣುಗಳಿಗಿಂತ, ರಾಸಾಯನಿಕ ಸಿಂಪಡಿಸಿ ರಾತ್ರೋರಾತ್ರಿ ಕೃತಕವಾಗಿ ಮಾಗಿಸಿದ (Artificially ripened) ಹಣ್ಣುಗಳದ್ದೇ ದರ್ಬಾರು.

ಏನಿದು ಮಸಾಲಾ ಅಥವಾ ಕ್ಯಾಲ್ಸಿಯಂ ಕಾರ್ಬೈಡ್?

ಹಣ್ಣುಗಳು ಬೇಗ ಮಾಗಲಿ, ನೋಡಲು ಆಕರ್ಷಕವಾಗಿ ಕಾಣಲಿ ಹಾಗೂ ಬೇಗನೆ ದುಡ್ಡು ಮಾಡಿಕೊಳ್ಳೋಣ ಎಂಬ ದುರಾಸೆಯಿಂದ ಕೆಲ ವ್ಯಾಪಾರಿಗಳು ಕ್ಯಾಲ್ಸಿಯಂ ಕಾರ್ಬೈಡ್ (Calcium Carbide) ಎಂಬ ಅಪಾಯಕಾರಿ ರಾಸಾಯನಿಕವನ್ನು ಬಳಸುತ್ತಾರೆ. ವ್ಯಾಪಾರಿಗಳ ಭಾಷೆಯಲ್ಲಿ ಇದಕ್ಕೆ ಮಸಾಲಾ ಎಂದು ಕರೆಯಲಾಗುತ್ತದೆ.

ಕಾಯಿಗಳ ಮಧ್ಯೆ ಈ ಕಾರ್ಬೈಡ್ ಪುಡಿಯ ಪೊಟ್ಟಣಗಳನ್ನು ಇಟ್ಟರೆ, ಅದರಿಂದ ಅಸಿಟಿಲೀನ್ ಗ್ಯಾಸ್ ಬಿಡುಗಡೆಯಾಗಿ ಕೇವಲ 24 ಗಂಟೆಗಳಲ್ಲಿ ಕಚ್ಚಾ ಹಣ್ಣುಗಳು ಸಂಪೂರ್ಣವಾಗಿ ಹಳದಿ ಬಣ್ಣಕ್ಕೆ ತಿರುಗುತ್ತವೆ. ಆದರೆ, ಕೇವಲ ಹೊರಗಿನ ಬಣ್ಣ ಬದಲಾಗುತ್ತದೆಯೇ ಹೊರತು, ಒಳಗಡೆ ಹಣ್ಣು ಇನ್ನೂ ಕಾಯಿಯಾಗಿಯೇ ಇರುತ್ತದೆ!

ದೇಹವನ್ನು ಸೇರುತ್ತಿದೆ ಆರ್ಸೆನಿಕ್ ಮತ್ತು ಫಾಸ್ಫರಸ್!

ಮರದಲ್ಲಿಯೇ ಸ್ವಾಭಾವಿಕವಾಗಿ ಮಾಗಿದ ಹಣ್ಣುಗಳು ವಿಟಮಿನ್ A, C ಹಾಗೂ ಅನೇಕ ಪೋಷಕಾಂಶಗಳ ಸಮೃದ್ಧ ಮೂಲವಾಗಿರುತ್ತವೆ. ಆದರೆ, ಈ ಕಾರ್ಬೈಡ್‌ನಲ್ಲಿ ಆರ್ಸೆನಿಕ್ ಮತ್ತು ಫಾಸ್ಫರಸ್‌ನಂತಹ ತೀವ್ರ ವಿಷಕಾರಿ ಅಂಶಗಳಿರುತ್ತವೆ. ಇವು ಮಾನವನ ದೇಹವನ್ನು ಸೇರಿದರೆ ದೊಡ್ಡ ಅನಾಹುತವೇ ಕಾದಿರುತ್ತದೆ.

• ತಕ್ಷಣದ ಪರಿಣಾಮಗಳು: ಈ ಹಣ್ಣುಗಳನ್ನು ತಿಂದ ತಕ್ಷಣ ವಾಂತಿ, ಹೊಟ್ಟೆ ಮತ್ತು ಎದೆ ಉರಿ, ಅತಿಯಾದ ಬಾಯಾರಿಕೆ ಹಾಗೂ ಚರ್ಮದ ಅಲರ್ಜಿ ಕಾಣಿಸಿಕೊಳ್ಳಬಹುದು.
• ದೀರ್ಘಕಾಲೀನ ದುಷ್ಪರಿಣಾಮಗಳು: ಸತತವಾಗಿ ಇಂತಹ ಹಣ್ಣುಗಳನ್ನು ಸೇವಿಸುತ್ತಿದ್ದರೆ, ಉಸಿರಾಟದ ವ್ಯವಸ್ಥೆ ಹಾಳಾಗಿ ಉಬ್ಬಸ, ಶ್ವಾಸಕೋಶದ ತೊಂದರೆ ಬರುತ್ತದೆ. ನರಮಂಡಲದ ಮೇಲೆ ನೇರ ಪ್ರಭಾವ ಬೀರಿ ತಲೆನೋವು, ನಿದ್ರಾಹೀನತೆ, ಜ್ಞಾಪಕ ಶಕ್ತಿ ಕುಂಠಿತಗೊಳ್ಳುವುದು ಮತ್ತು ಅಲ್ಸರ್‌ನಂತಹ ಭೀಕರ ಕಾಯಿಲೆಗಳು ಆವರಿಸುತ್ತವೆ. (ಸೂಚನೆ: ಗರ್ಭಿಣಿಯರು ಮತ್ತು ಸಣ್ಣ ಮಕ್ಕಳು ಇಂತಹ ಕೃತಕ ಹಣ್ಣುಗಳಿಂದ ಆದಷ್ಟು ದೂರವಿರುವುದು ಅತ್ಯಗತ್ಯ).

ಕೃತಕ ಹಣ್ಣುಗಳನ್ನು ಗುರುತಿಸುವುದು ಹೇಗೆ?

ಮಾರುಕಟ್ಟೆಯಲ್ಲಿ ಯಾವುದು ನೈಸರ್ಗಿಕ ಹಣ್ಣು, ಯಾವುದು ಕಾರ್ಬೈಡ್ ಹಣ್ಣು ಎಂದು ಕಂಡುಹಿಡಿಯಲು ಈ ಸಿಂಪಲ್ ಟ್ರಿಕ್ಸ್ ಬಳಸಿ:

1. ಬಣ್ಣ ಗಮನಿಸಿ: ನೈಸರ್ಗಿಕವಾಗಿ ಮಾಗಿದ ಹಣ್ಣಿನಲ್ಲಿ ಅಲ್ಲಲ್ಲಿ ಹಸಿರು ಮತ್ತು ಹಳದಿ ಬಣ್ಣದ ಮಿಶ್ರಣವಿರುತ್ತದೆ. ಆದರೆ, ಕೃತಕವಾಗಿ ಮಾಗಿಸಿದ ಹಣ್ಣುಗಳು ಒಂದೇ ಸಮನೆ ಪರ್ಫೆಕ್ಟ್ ಹಳದಿ ಅಥವಾ ಕೆಂಪು ಬಣ್ಣದಿಂದ ಕೂಡಿರುತ್ತವೆ.
2. ಬಾಳೆಹಣ್ಣಿನ ಟೆಸ್ಟ್: ಬಾಳೆಹಣ್ಣಿನ ಸಿಪ್ಪೆ ಪೂರ್ತಿ ಹಳದಿಯಾಗಿದ್ದು, ಅದರ ಕಾಂಡ (ದಂಟು) ಮಾತ್ರ ಇನ್ನೂ ಹಚ್ಚ ಹಸಿರಾಗಿದ್ದರೆ, ಅದು ನೂರಕ್ಕೆ ನೂರು ಕಾರ್ಬೈಡ್‌ನಿಂದ ಮಾಗಿಸಿದ ಹಣ್ಣು ಎಂದು ಅರ್ಥ.
3. ವಾಸನೆ ಮತ್ತು ರುಚಿ: ಸ್ವಾಭಾವಿಕ ಹಣ್ಣುಗಳಿಂದ ಸುಮಧುರವಾದ ನೈಸರ್ಗಿಕ ಪರಿಮಳ ಬರುತ್ತದೆ. ಕಾರ್ಬೈಡ್ ಹಣ್ಣುಗಳಿಗೆ ಯಾವುದೇ ವಾಸನೆ ಇರುವುದಿಲ್ಲ ಮತ್ತು ತಿಂದಾಗ ಒಳಗಡೆ ಹುಳಿ ಅಥವಾ ಒಗರು ಇರುತ್ತದೆ.
4. ನೀರಿನ ಟೆಸ್ಟ್: ಹಣ್ಣುಗಳನ್ನು ತಂದ ತಕ್ಷಣ ಒಂದು ಬಕೆಟ್ ನೀರಿನಲ್ಲಿ ಹಾಕಿ. ಸ್ವಾಭಾವಿಕ ಹಣ್ಣುಗಳು ಭಾರವಿದ್ದು ನೀರಿನ ತಳಕ್ಕೆ ಹೋಗುತ್ತವೆ. ಕೃತಕ ಹಣ್ಣುಗಳು ನೀರಿನ ಮೇಲೆ ತೇಲುತ್ತವೆ.

ಹಣ್ಣು ತಿನ್ನುವ ಮುನ್ನ ಹೀಗೆ ಮಾಡಿ:

ಮಾರುಕಟ್ಟೆಯಿಂದ ತಂದ ಹಣ್ಣುಗಳನ್ನು ಕನಿಷ್ಠ 15-20 ನಿಮಿಷ ಉಪ್ಪು ನೀರಿನಲ್ಲಿ ಅಥವಾ ಹರಿಯುವ ನೀರಿನಲ್ಲಿ ಚೆನ್ನಾಗಿ ತೊಳೆಯಿರಿ. ಸೇಬು, ಮಾವು ಮುಂತಾದ ಹಣ್ಣುಗಳನ್ನು ಸಿಪ್ಪೆ ತೆಗೆದೇ (Peel off) ತಿನ್ನುವ ಅಭ್ಯಾಸ ಮಾಡಿಕೊಳ್ಳಿ.

ನೀಡ್ಸ್ ಆಫ್ ಪಬ್ಲಿಕ್ ಒಳನೋಟ:

ನೀಡ್ಸ್ ಆಫ್ ಪಬ್ಲಿಕ್’ ಡಿಜಿಟಲ್ ಡೆಸ್ಕ್‌ನ ದೃಷ್ಟಿಕೋನದ ಪ್ರಕಾರ ಮಾರುಕಟ್ಟೆಯಲ್ಲಿ ನಡೆಯುತ್ತಿರುವ ಈ ಕಾರ್ಬೈಡ್ ದಂಧೆ ಸಾರ್ವಜನಿಕ ಆರೋಗ್ಯದ ಮೇಲೆ ನಡೆಯುತ್ತಿರುವ ಸೈಲೆಂಟ್ ಸರ್ಜಿಕಲ್ ಸ್ಟ್ರೈಕ್ ಆಗಿದೆ. ನಮ್ಮ ದಾವಣಗೆರೆ ಸೇರಿದಂತೆ ಬಹುತೇಕ ನಗರಗಳ ಹಣ್ಣಿನ ಮಾರುಕಟ್ಟೆಗಳಲ್ಲಿ ಮಸಾಲಾ ಹಣ್ಣುಗಳ ಹಾವಳಿ ವಿಪರೀತವಾಗಿದೆ.

ಆಹಾರ ಸುರಕ್ಷತಾ ಇಲಾಖೆ (FSSAI) ಕಾನೂನುಬದ್ಧವಾಗಿ ಕ್ಯಾಲ್ಸಿಯಂ ಕಾರ್ಬೈಡ್ ಬಳಕೆಯನ್ನು ನಿಷೇಧಿಸಿದೆ ಮತ್ತು ಉಲ್ಲಂಘಿಸಿದವರಿಗೆ 3 ವರ್ಷಗಳ ಜೈಲು ಶಿಕ್ಷೆ ಹಾಗೂ ದಂಡದ ಅವಕಾಶವಿದೆ. ಆದರೆ, ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ಇದು ರಾಜಾರೋಷವಾಗಿ ನಡೆಯುತ್ತಿದೆ. ಹೀಗಾಗಿ, ಆಕರ್ಷಕ ಬಣ್ಣಕ್ಕೆ ಮರುಳಾಗದೆ, ಪರಿಚಿತ ರೈತರಿಂದ ಅಥವಾ ನಂಬಿಕಸ್ಥ ಸ್ಥಳೀಯ ವ್ಯಾಪಾರಿಗಳಿಂದ ನೈಸರ್ಗಿಕವಾಗಿ ಮಾಗಿದ ಹಣ್ಣುಗಳನ್ನು ಖರೀದಿಸುವುದೇ ನಮ್ಮ ಆರೋಗ್ಯಕ್ಕೆ ಶ್ರೀರಕ್ಷೆ.

ಈ ವಿಷಯವನ್ನು ಓದಿ ನೀವಷ್ಟೇ ತಿಳಿದುಕೊಂಡು ಸುಮ್ಮನಾದೆ, ನಿಮ್ಮ ಕುಟುಂಬ ಹಾಗೂ ಸ್ನೇಹಿತರ ವಾಟ್ಸಾಪ್ ಗ್ರೂಪ್ ಗಳಿಗೆ ಶೇರ್ ಮಾಡಿ.

ಈ ಮಾಹಿತಿಗಳನ್ನು ಓದಿ

ದಯವಿಟ್ಟು ಗಮನಿಸಿ: ನೀಡ್ಸ್ ಆಫ್ ಪಬ್ಲಿಕ್ ತನ್ನ ಓದುಗರಿಗೆ ನಿಖರವಾದ ಮತ್ತು ಅಧಿಕೃತ ಮಾಹಿತಿಗಳನ್ನು ಮಾತ್ರ ಪ್ರಕಟಿಸುತ್ತದೆ. ಇಲ್ಲಿ ನಾವು ಯಾವುದೇ ಅನಧಿಕೃತ ಮತ್ತು ಸುಳ್ಳು ಮಾಹಿತಿ ಬಿತ್ತರಿಸುವುದಿಲ್ಲ.

ರಕ್ಷಿತ್ ಎಂ

“ರಕ್ಷಿತ್ ಅವರು NeedsOfPublic.in ನಲ್ಲಿ ಜ್ಯೋತಿಷ್ಯ, ಜೀವನಶೈಲಿ (Lifestyle) ಮತ್ತು ಆರೋಗ್ಯ ವಿಭಾಗದ ಹಿರಿಯ ಲೇಖಕರಾಗಿದ್ದಾರೆ. ಜೀವನಶೈಲಿ ಮತ್ತು ಆಧ್ಯಾತ್ಮಿಕ ವಿಷಯಗಳ ಲೇಖನ ಕ್ಷೇತ್ರದಲ್ಲಿ 4 ವರ್ಷಗಳ ಸುದೀರ್ಘ ಅನುಭವ ಹೊಂದಿರುವ ಇವರು, ದೈನಂದಿನ ರಾಶಿ ಭವಿಷ್ಯದ ಜೊತೆಗೆ ಚಾಣಕ್ಯ ನೀತಿಯ ಮೌಲ್ಯಗಳು, ಮನೆಮದ್ದುಗಳು (Health Tips), ಕಿಚನ್ ಟಿಪ್ಸ್ ಮತ್ತು ದೈನಂದಿನ ಜೀವನಕ್ಕೆ ಸಹಕಾರಿಯಾಗುವ ಉಪಯುಕ್ತ ಮಾಹಿತಿಗಳ ಬಗ್ಗೆ ಬರೆಯುತ್ತಾರೆ. ಪುರಾತನ ಜ್ಞಾನ ಮತ್ತು ಆಧುನಿಕ ಜೀವನಶೈಲಿಯನ್ನು ಸಮತೋಲನಗೊಳಿಸಿ ಓದುಗರಿಗೆ ಸರಳ ಹಾಗೂ ಪರಿಣಾಮಕಾರಿ ಸಲಹೆಗಳನ್ನು ನೀಡುವುದು ಇವರ ವೈಶಿಷ್ಟ್ಯವಾಗಿದೆ.”