ಬೆಂಗಳೂರಿನಲ್ಲಿ ಹಸಿರು ಹೊದಿಕೆ ಕುಸಿತ: ಜೂನ್ 28ರಂದು ಬೃಹತ್ ‘ಮರಗಳಿಗಾಗಿ ಓಟ’

ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಹಸಿರು ಹೊದಿಕೆ ಆತಂಕಕಾರಿ ಮಟ್ಟಕ್ಕೆ ಕುಸಿಯುತ್ತಿದ್ದು, ಪರಿಸರ ಜಾಗೃತಿಗಾಗಿ ಜೂನ್ 28ರಂದು ‘ರನ್ ಫಾರ್ ಟ್ರೀಸ್’ (ಮರಗಳಿಗಾಗಿ ಓಟ) ಮ್ಯಾರಥಾನ್ ಆಯೋಜಿಸಲಾಗಿದೆ. ಮಾಜಿ ಶಾಸಕ ನೆಲ ನರೇಂದ್ರ ಬಾಬು ಹಾಗೂ ಗ್ರೀನ್ ಪಾತ್ ಸಂಸ್ಥೆಯ ಈ ಮಹತ್ವದ ಅಭಿಯಾನದ ಸಂಪೂರ್ಣ ವರದಿ…

ಬೆಂಗಳೂರಿನಲ್ಲಿ ಕಣ್ಮರೆಯಾಗುತ್ತಿದೆ ಹಸಿರು ಹೊದಿಕೆ: ಪರಿಸರ ಉಳಿಸಲು ‘ಮರಗಳಿಗಾಗಿ ಓಟ’ ಕ್ರಾಂತಿ!

ಬೆಂಗಳೂರು (ವಿಶೇಷ ವರದಿ): ಒಂದು ಕಾಲದಲ್ಲಿ ‘ಗಾರ್ಡನ್ ಸಿಟಿ’ (ಉದ್ಯಾನ ನಗರಿ) ಎಂದು ಜಗತ್ತಿನಾದ್ಯಂತ ಖ್ಯಾತಿ ಪಡೆದಿದ್ದ ನಮ್ಮ ಬೆಂಗಳೂರು, ಕಾಂಕ್ರೀಟ್ ಕಾಡಾಗಿ ಬದಲಾಗುತ್ತಿರುವ ಕಟು ವಾಸ್ತವ ನಮ್ಮ ಕಣ್ಣ ಮುಂದಿದೆ. ನಗರದ 28 ವಿಧಾನಸಭಾ ಕ್ಷೇತ್ರಗಳ ಪೈಕಿ ಬಹುತೇಕ ಕಡೆಗಳಲ್ಲಿ ‘ಹಸಿರು ಹೊದಿಕೆ’ (Green Cover) ಆತಂಕಕಾರಿ ಮಟ್ಟಕ್ಕೆ ಕುಸಿದಿದೆ. ಈ ಜಿಡ್ಡುಗಟ್ಟಿದ ವ್ಯವಸ್ಥೆ ಹಾಗೂ ಜನರ ಮನಸ್ಸುಗಳನ್ನು ಎಚ್ಚರಿಸಲು, ಕಲುಷಿತ ಗಾಳಿಯಿಂದ ನಮ್ಮ ಭವಿಷ್ಯದ ಪೀಳಿಗೆಯನ್ನು ರಕ್ಷಿಸಲು ಇದೀಗ ‘ರನ್ ಫಾರ್ ಟ್ರೀಸ್’ (ಮರಗಳಿಗಾಗಿ ಓಟ) ಎಂಬ ವಿಶಿಷ್ಟ ಹಾಗೂ ಅತ್ಯಗತ್ಯ ಸಮಾಜಮುಖಿ ಮ್ಯಾರಥಾನ್ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ..

ಶುಕ್ರವಾರ ನಗರದ ಗ್ರೀನ್ ಪಾತ್ ಆರ್ಗ್ಯಾನಿಕ್ ರೆಸ್ಟೋರೆಂಟ್‌ನಲ್ಲಿ ನಡೆದ ವಿಶೇಷ ಸುದ್ದಿಗೋಷ್ಠಿಯಲ್ಲಿ, ಮಾಜಿ ಶಾಸಕ ನೆಲ ನರೇಂದ್ರ ಬಾಬು ಹಾಗೂ ಗ್ರೀನ್ ಪಾತ್ ಸಂಸ್ಥಾಪಕ ಹೆಚ್.ಆರ್. ಜಯರಾಂ ಅವರು ಈ ಪರಿಸರ ಕ್ರಾಂತಿಯ ರೂಪುರೇಷೆಗಳನ್ನು ಮತ್ತು ರಾಜಧಾನಿಯ ಪ್ರಸ್ತುತ ಆತಂಕಕಾರಿ ಪರಿಸ್ಥಿತಿಯನ್ನು ಮಾಧ್ಯಮಗಳ ಮುಂದೆ ಬಿಚ್ಚಿಟ್ಟರು.,

ಬೆಚ್ಚಿಬೀಳಿಸುವ ಅಂಕಿ-ಅಂಶ: ಎಲ್ಲೋಯ್ತು ಬೆಂಗಳೂರಿನ ಹಸಿರು?

ಸುದ್ದಿಗೋಷ್ಠಿಯಲ್ಲಿ ಕಳವಳ ವ್ಯಕ್ತಪಡಿಸಿದ ಮಾಜಿ ಶಾಸಕ ನೆಲ ನರೇಂದ್ರ ಬಾಬು, ನಗರದ ಪ್ರತಿಷ್ಠಿತ ಬಡಾವಣೆಗಳಲ್ಲಿ ಹಸಿರು ಕಣ್ಮರೆಯಾಗುತ್ತಿರುವ ನೈಜ ಅಂಕಿ-ಅಂಶಗಳನ್ನು ತೆರೆದಿಟ್ಟರು:

• ಗಾಂಧಿನಗರ: ಹಿಂದೆ ಶೇ. 8ರಷ್ಟಿದ್ದ ಹಸಿರು ಹೊದಿಕೆ ಇಂದು ಕೇವಲ 2% ಕ್ಕೆ ಇಳಿದಿದೆ.!
• ಚಿಕ್ಕಪೇಟೆ: ಶೇ. 3ರಷ್ಟಿದ್ದ ಹಸಿರು ಕವರ್ ಇದೀಗ 1% ಕ್ಕಿಂತಲೂ ಕಡಿಮೆಯಾಗಿದೆ.
• ಜಯನಗರ: ಬರೋಬ್ಬರಿ 32% ರಷ್ಟು ಹಸಿರಿನಿಂದ ಕಂಗೊಳಿಸುತ್ತಿದ್ದ ಪ್ರದೇಶ ಇಂದು 22% ಕ್ಕೆ ಕುಸಿದಿದೆ..
• ರಾಜಾಜಿನಗರ: 30% ರಷ್ಟಿದ್ದ ಮರಗಳ ಪ್ರಮಾಣ 18% ಕ್ಕೆ ಬಂದು ನಿಂತಿದೆ. (ಸೂಚನೆ: ಯಲಹಂಕ ಮತ್ತು ಯಶವಂತಪುರ ವಿಧಾನಸಭಾ ಕ್ಷೇತ್ರಗಳ ಹೊರವಲಯವನ್ನು ಹೊರತುಪಡಿಸಿದರೆ, ಇಡೀ ಸಿಲಿಕಾನ್ ಸಿಟಿಯ ಗ್ರೀನ್ ಕ್ಯಾಪ್ ನಿರಂತರವಾಗಿ ಕಡಿಮೆಯಾಗುತ್ತಲೇ ಇದೆ)..

ಉಸಿರಾಟಕ್ಕೆ ಕುತ್ತು: “ವೈಜ್ಞಾನಿಕವಾಗಿ ಪ್ರತಿಯೊಬ್ಬ ಮನುಷ್ಯನ ಆರೋಗ್ಯಕರ ಉಸಿರಾಟಕ್ಕೆ ಕನಿಷ್ಠ ಮೂರು ಸಮೃದ್ಧ ಮರಗಳ ಅಗತ್ಯವಿದೆ. ಆದರೆ ಇಂದು ನಾವು ಮತ್ತು ನಮ್ಮ ಮಕ್ಕಳು ಶುದ್ಧ ಗಾಳಿಯ ಬದಲು ಕಲುಷಿತ ಗಾಳಿಯನ್ನೇ ಸೇವಿಸುತ್ತಿದ್ದು, ಶ್ವಾಸಕೋಶದ ಕಾಯಿಲೆಗಳಿಗೆ ತುತ್ತಾಗುತ್ತಿದ್ದೇವೆ. ಕೆರೆಗಳ ನಾಶ, ಅಂತರ್ಜಲ ಕುಸಿತ ಹಾಗೂ 1.25 ಕೋಟಿಗೂ ಅಧಿಕ ಜನಸಂಖ್ಯೆಯ ನೀರಿನ ಸಮಸ್ಯೆಗೆ ‘ಮರ ನೆಡುವುದು’ ಒಂದೇ ಶಾಶ್ವತ ಪರಿಹಾರ” ಎಂದು ನರೇಂದ್ರ ಬಾಬು ಖಡಕ್ ಎಚ್ಚರಿಕೆ ನೀಡಿದರು.

ಏನಿದು ‘ಟ್ರೀ ಕಲ್ಚರ್’ (ಮರ ಕೃಷಿ) ಕ್ರಾಂತಿ?

ಪರಿಸರ ನಾಶಕ್ಕೆ ಕೇವಲ ಆತಂಕ ಪಡುವುದಲ್ಲ, ಅದಕ್ಕೆ ಪ್ರಾಯೋಗಿಕ ಪರಿಹಾರವನ್ನು ಸೂಚಿಸಿದವರು ಗ್ರೀನ್ ಪಾತ್ ಸಂಸ್ಥಾಪಕ ಹೆಚ್.ಆರ್. ಜಯರಾಂ.

ಅವರು ಪ್ರತಿಪಾದಿಸಿದ ಪರಿಕಲ್ಪನೆಯೇ ‘ಟ್ರೀ ಕಲ್ಚರ್’ (Tree Culture). ಇದು ನಿರಂತರ ಆಹಾರ ಮತ್ತು ಆದಾಯ ನೀಡುವ ಒಂದು ಸುಸ್ಥಿರ ಕೃಷಿ ಪದ್ಧತಿಯಾಗಿದೆ. “ಆಹಾರ ಅರಣ್ಯ ಕೃಷಿ ಮಾದರಿಗಳು ಶೂನ್ಯ ಖರ್ಚು, ಕಡಿಮೆ ನೀರಿನ ಬಳಕೆ ಹಾಗೂ ಮಣ್ಣಿನ ಫಲವತ್ತತೆಯನ್ನು ಹೆಚ್ಚಿಸುವ ಅದ್ಭುತ ಶಕ್ತಿ ಹೊಂದಿವೆ. ನಮ್ಮ ದೇಶದ ಸದ್ಯದ ಕೃಷಿ ಮತ್ತು ಪರಿಸರ ಸಮಸ್ಯೆಗಳಿಗೆ ಇದೇ ಬಹುದೊಡ್ಡ ಪರಿಹಾರ” ಎಂದು ಅವರು ವಿಶ್ಲೇಷಿಸಿದರು.

ಸುಕೃಷಿಯ ಯಶಸ್ವಿ ಮಾದರಿ: ಗ್ರೀನ್ ಪಾತ್ ಸಂಸ್ಥೆಯು ಕಳೆದ 27 ವರ್ಷಗಳ ಹಿಂದೆಯೇ ನೆಲಮಂಗಲದ ಬಳಿಯ ‘ಸುಕೃಷಿ ಸಾವಯವ ತೋಟ’ದಲ್ಲಿ ಈ ಕೃಷಿ ಮಾದರಿಯನ್ನು ಅಳವಡಿಸಿ ಯಶಸ್ವಿಯಾಗಿದೆ. ಇಂದು ದೇಶ-ವಿದೇಶಗಳ ಕೃಷಿಕರು ಇದನ್ನು ಅಧ್ಯಯನ ಮಾಡುತ್ತಿದ್ದಾರೆ. ಇದೇ ಪದ್ಧತಿಯನ್ನು ಈಗ ಒಂದು ‘ಚಳುವಳಿ’ಯನ್ನಾಗಿ ರೂಪಿಸಲು ಈ ಓಟವನ್ನು ಆಯೋಜಿಸಲಾಗಿದೆ.

ಜೂನ್ 28ರಂದು ನಡೆಯಲಿದೆ ‘ಮರಗಳಿಗಾಗಿ ಓಟ’

ಈ ಬೃಹತ್ ಜಾಗೃತಿ ಅಭಿಯಾನವು ಕೇವಲ ಭಾಷಣಕ್ಕೆ ಸೀಮಿತವಾಗಿಲ್ಲ. ಎಲ್ಲಾ ಸಮುದಾಯಗಳನ್ನು ಈ ಪರಿಸರ ಚಳುವಳಿಯ ಭಾಗವಾಗಿಸಲು ಬೃಹತ್ ಮ್ಯಾರಥಾನ್ ಮತ್ತು ವಾಕಥಾನ್ (Walkathon) ಆಯೋಜಿಸಲಾಗಿದೆ ಎಂದು ಕಾರ್ಯಕ್ರಮದ ವ್ಯವಸ್ಥಾಪಕಿ ಭಾಗ್ಯಲಕ್ಷ್ಮಿ ಜಿ.ಆರ್ ಮಾಹಿತಿ ನೀಡಿದರು.

• ದಿನಾಂಕ ಮತ್ತು ಸಮಯ: ಜೂನ್ 28 ರಂದು, ಮುಂಜಾನೆ 5:30 ಕ್ಕೆ.
• ಭಾಗವಹಿಸುವವರ ನಿರೀಕ್ಷೆ: ಸುಮಾರು 5,000 ಓಟಗಾರರು.
• ಧ್ಯೇಯವಾಕ್ಯ: “ಒಬ್ಬ ಓಟಗಾರ / ಓಟಗಾರ್ತಿಗೆ ಒಂದು ಮರ” (One Runner = One Tree).
• ಸಸಿ ನೆಡುವ ಅಭಿಯಾನ: ಅಂದಿನ ದಿನ ನಗರದ ಪ್ರಸಿದ್ಧ ‘ಸ್ಯಾಂಕಿ ಟ್ಯಾಂಕ್’ (Sankey Tank) ಬದುಗಳಲ್ಲಿ ಗಿಡ ನೆಡುವ ಅಭಿಯಾನವನ್ನು ಸಾಂಕೇತಿಕವಾಗಿ ನಡೆಸಲಾಗುತ್ತದೆ.

ರೇಸ್ ಡೈರೆಕ್ಟರ್ ಸುನಿಲ್ ಕೆ.ಜಿ ಅವರು ಓಟದ ಮಾರ್ಗ ಮತ್ತು ಇತರ ತಾಂತ್ರಿಕ ವಿವರಗಳನ್ನು ಹಂಚಿಕೊಂಡರು. ಈ ಬೃಹತ್ ಕಾರ್ಯಕ್ರಮದಲ್ಲಿ ನಾಡಿನ ಹಲವು ಗಣ್ಯ ವ್ಯಕ್ತಿಗಳು, ಪರಿಸರ ಪ್ರೇಮಿಗಳು ಹಾಗೂ ಸೆಲೆಬ್ರಿಟಿಗಳು ಭಾಗವಹಿಸಲಿದ್ದಾರೆ.

ಬೆಂಗಳೂರು ಕೇವಲ ಐಟಿ-ಬಿಟಿ ಕಂಪನಿಗಳಿಂದಷ್ಟೇ ಬೆಳೆಯಬಾರದು, ಅದು ತನ್ನ ಮಣ್ಣಿನ ಹಸಿರಿನಿಂದಲೂ ಉಸಿರಾಡಬೇಕು. ಕಣ್ಮರೆಯಾಗುತ್ತಿರುವ ಕೆರೆಗಳು ಮತ್ತು ಮರಗಳು ನಮಗೆ ಎಚ್ಚರಿಕೆಯ ಗಂಟೆಯಾಗಿವೆ. ಜೂನ್ 28ರಂದು ನಡೆಯಲಿರುವ ಈ ‘ಮರಗಳಿಗಾಗಿ ಓಟ’ ಕೇವಲ ಬೆವರು ಸುರಿಸುವ ಮ್ಯಾರಥಾನ್ ಅಲ್ಲ; ಇದು ನಮ್ಮ ಮುಂದಿನ ಪೀಳಿಗೆಗೆ ಶುದ್ಧ ಗಾಳಿಯನ್ನು ಕಾಯ್ದಿರಿಸುವ ಒಂದು ಪವಿತ್ರ ಯಜ್ಞ. ನೀವೂ ಬನ್ನಿ, ಹಸಿರು ಉಸಿರಾಗಲಿ!..

ವರದಿ: ಸನತ್ ದೇಸಾಯಿ, ನೀಡ್ಸ್ ಆಫ್ ಪಬ್ಲಿಕ್ – ಬೆಂಗಳೂರು

ಇದೇ ರೀತಿಯ ನಿಖರ ಸುದ್ದಿಗಳಿಗೆ ನಮ್ಮ ನೀಡ್ಸ್ ಪಬ್ಲಿಕ್ ಆಪ್ ಡೌನ್ಲೋಡ್ App ಮಾಡಿ

NEEDS OF PUBLIC APP

ಈ ಮಾಹಿತಿಗಳನ್ನು ಓದಿ:

ಸನತ್ ದೇಸಾಯಿ

ಸನತ್ ದೇಸಾಯಿ ಅವರು ನಮ್ಮ ಜಾಲತಾಣದ ಬೆಂಗಳೂರು ವಿಭಾಗದ ವರದಿಗಾರರಾಗಿದ್ದಾರೆ. ಇವರು ಬಿಐಇಟಿ (BIET) ಯಿಂದ ಮೆಕ್ಯಾನಿಕಲ್ ಎಂಜಿನಿಯರಿಂಗ್ (B.E) ಹಾಗೂ ಕೆಎಸ್‌ಒಯು (KSOU) ನಿಂದ ಎಂ.ಎ (ಪತ್ರಿಕೋದ್ಯಮ) ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಕಳೆದ 7 ವರ್ಷಗಳಿಂದ ಫೀಲ್ಡ್ ಜರ್ನಲಿಸಂನಲ್ಲಿ ಸೇವೆ ಸಲ್ಲಿಸುತ್ತಿರುವ ಇವರು, ಈ ಹಿಂದೆ ‘ಈಟಿವಿ ಭಾರತ್’ (ETV Bharat) ನಲ್ಲಿ ಅಪರಾಧ, ರಾಜಕೀಯ, ವಿಜ್ಞಾನ-ತಂತ್ರಜ್ಞಾನ ಮತ್ತು ಸಿನಿಮಾ ವಿಭಾಗಗಳಲ್ಲಿ ವ್ಯಾಪಕ ವರದಿಗಾರಿಕೆ ಮಾಡಿದ ಅನುಭವ ಹೊಂದಿದ್ದಾರೆ. ಪ್ರಸ್ತುತ ನೃಪತುಂಗ ವಿಶ್ವವಿದ್ಯಾಲಯದಲ್ಲಿ ಕುಲಪತಿಗಳ ಆಪ್ತ ಕಾರ್ಯದರ್ಶಿ ಮತ್ತು ಸಾರ್ವಜನಿಕ ಸಂಪರ್ಕಾಧಿಕಾರಿಯಾಗಿ (PRO) ಕೂಡ ಸೇವೆ ಸಲ್ಲಿಸುತ್ತಿದ್ದಾರೆ.