ಇ-ಸ್ವತ್ತು 2.0 ಜಾರಿ: ನಿಮ್ಮ ಆಸ್ತಿ ದಾಖಲೆ ನಮೂನೆ 11A, 11B ಪಡೆಯಲು ಮೊಬೈಲ್‌ನಲ್ಲೇ ಅರ್ಜಿ ಸಲ್ಲಿಸಿ!

ಕರ್ನಾಟಕ ಸರ್ಕಾರದ ಮಹತ್ವಾಕಾಂಕ್ಷಿ ಇ-ಸ್ವತ್ತು 2.0 (e-Swathu 2.0) ತಂತ್ರಾಂಶ ಜಾರಿಯಾಗಿದೆ. ಗ್ರಾಮ ಪಂಚಾಯತಿ ವ್ಯಾಪ್ತಿಯ ನಮೂನೆ 11ಎ ಮತ್ತು 11ಬಿ ಆಸ್ತಿ ದಾಖಲೆಗಳನ್ನು ಮನೆಯಲ್ಲೇ ಕುಳಿತು ಮೊಬೈಲ್ ಮೂಲಕ ಪಡೆಯುವುದು ಹೇಗೆ? ಶುಲ್ಕವೆಷ್ಟು? ಸಂಪೂರ್ಣ ಮಾಹಿತಿ ಇಲ್ಲಿದೆ.

ಬೆಂಗಳೂರು: ನಿಮ್ಮ ಸ್ವಂತ ಜಾಗ ಅಥವಾ ಮನೆಯ ದಾಖಲಾತಿಗಳನ್ನು ಪಡೆಯಲು ಪಂಚಾಯತಿ ಕಚೇರಿಗಳಿಗೆ ಅಲೆದು, ದಿನಗಟ್ಟಲೆ ಕಾಯುವ ಹಾಗೂ ಮಧ್ಯವರ್ತಿಗಳಿಗೆ ಹಣ ಕೊಡುವ ದಿನಗಳು ಇನ್ನು ಮುಂದೆ ಇತಿಹಾಸ. ಹೌದು, ರಾಜ್ಯದ ನಾಗರಿಕರು ತಮ್ಮ ಆಸ್ತಿಗಳ ದಾಖಲಾತಿಯನ್ನು ಅತ್ಯಂತ ಸರಳವಾಗಿ ಮತ್ತು ಪಾರದರ್ಶಕವಾಗಿ ಪಡೆಯಲು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆಯು ‘ಇ-ಸ್ವತ್ತು 2.0’ (e-Swathu 2.0) ಎಂಬ ನೂತನ ತಂತ್ರಾಂಶವನ್ನು ಜಾರಿಗೆ ತಂದಿದೆ.

ಇದರ ಮೂಲಕ ಸಾರ್ವಜನಿಕರು ತಮ್ಮ ಆಸ್ತಿಯ ಅಧಿಕೃತ ದಾಖಲೆಗಳಾದ ‘ನಮೂನೆ 11ಎ’ (Form 11A) ಮತ್ತು ‘ನಮೂನೆ 11ಬಿ’ (Form 11B) ಗಾಗಿ ಮನೆಯಲ್ಲೇ ಕುಳಿತು ತಮ್ಮ ಸ್ಮಾರ್ಟ್‌ಫೋನ್ ಮೂಲಕವೇ ಅರ್ಜಿ ಸಲ್ಲಿಸಲು ಮುಕ್ತ ಅವಕಾಶ ಕಲ್ಪಿಸಲಾಗಿದೆ.

ಡಿಜಿಟಲ್ ಯುಗಕ್ಕೆ ತಕ್ಕಂತೆ ಆಸ್ತಿ ದಾಖಲೆಗಳ ನಿರ್ವಹಣೆಯೂ ಈಗ ಸ್ಮಾರ್ಟ್ ಆಗಿದೆ. ಇ-ಸ್ವತ್ತು ತಂತ್ರಾಂಶದ (e-Swathu Online Application) ಮೂಲಕ ಸರ್ಕಾರವು ಪಾರದರ್ಶಕತೆಗೆ ಮಣೆಹಾಕಿದ್ದು, ಸಾರ್ವಜನಿಕರು https://eswathu.karnataka.gov.in ಜಾಲತಾಣದ ಮೂಲಕ ಸ್ವಯಂಚಾಲಿತವಾಗಿ ಅರ್ಜಿ ಸಲ್ಲಿಸುವ ವ್ಯವಸ್ಥೆ ಜಾರಿಯಾಗಿದೆ.

ಈ ಕುರಿತ ಸಂಪೂರ್ಣ ಮಾಹಿತಿಯನ್ನು ನೀಡ್ಸ್ ಆಫ್ ಪಬ್ಲಿಕ್ ತಂಡ ನಿಮಗಾಗಿ ಕಲೆಹಾಕಿದೆ. ಹೊಸದಾಗಿ ಇ-ಸ್ವತ್ತಿಗೆ ಅರ್ಜಿ ಸಲ್ಲಿಸುವುದು ಹೇಗೆ? ಹಾಗೂ ಈಗಾಗಲೇ ನಿಮ್ಮ ಇ-ಖಾತೆ ಇದ್ದರೆ ಅದನ್ನು ಮೊಬೈಲ್‌ನಲ್ಲೇ ಡೌನ್‌ಲೋಡ್ ಮಾಡಿಕೊಳ್ಳುವುದು ಹೇಗೆ? ಎನ್ನುವ ಸಂಪೂರ್ಣ ಪ್ರಕ್ರಿಯೆಯನ್ನು ಕೆಳಗೆ ಹಂತ-ಹಂತವಾಗಿ ವಿವರಿಸಲಾಗಿದೆ.

ಏನಿದು ಇ-ಸ್ವತ್ತು 2.0? (What is e-Swathu 2.0)

ಗ್ರಾಮ ಪಂಚಾಯತಿ ವ್ಯಾಪ್ತಿಯಲ್ಲಿ ಬರುವ ನಿವೇಶನ, ಕೃಷಿಯೇತರ ಭೂಮಿ, ಮನೆ ಮುಂತಾದ ಆಸ್ತಿಗಳ ಮಾಲೀಕತ್ವವನ್ನು ದೃಢೀಕರಿಸುವ ಪ್ರಮುಖ ದಾಖಲೆಗಳೇ ನಮೂನೆ 11A ಮತ್ತು 11B. ಈ ಹಿಂದೆ ಈ ದಾಖಲೆಗಳನ್ನು ಪಡೆಯಲು ಕಚೇರಿಯಿಂದ ಕಚೇರಿಗೆ ಅಲೆಯಬೇಕಿತ್ತು.

ಆದರೆ ಇದೀಗ e-Swathu 2.0 ತಂತ್ರಾಂಶದ ಅಡಿಯಲ್ಲಿ ಪಾರದರ್ಶಕತೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದ್ದು, ನಾಗರಿಕರು ಅಧಿಕೃತ ವೆಬ್‌ಸೈಟ್ https://eswathu.karnataka.gov.in ಗೆ ಭೇಟಿ ನೀಡುವ ಮೂಲಕ ಸ್ವತಃ ತಾವೇ ಅರ್ಜಿ ಸಲ್ಲಿಸಬಹುದಾಗಿದೆ. ಡಿಜಿಟಲ್ ತಂತ್ರಜ್ಞಾನದ ಬಳಕೆಯಿಂದ ಆಸ್ತಿ ಮಾಲೀಕರು ತಮ್ಮ ಹಕ್ಕುಗಳನ್ನು ಹೆಚ್ಚು ಸುರಕ್ಷಿತವಾಗಿ ನಿರ್ವಹಿಸಲು ಇದು ಸಹಕಾರಿಯಾಗಲಿದೆ.

ಆನ್‌ಲೈನ್ ಗೊತ್ತಿಲ್ಲದವರಿಗೆ ಪರ್ಯಾಯ ವ್ಯವಸ್ಥೆ

ತಂತ್ರಜ್ಞಾನದ ಅರಿವಿಲ್ಲದ ಅಥವಾ ಆನ್‌ಲೈನ್ ವ್ಯವಸ್ಥೆ ಲಭ್ಯವಿಲ್ಲದ ನಾಗರಿಕರಿಗಾಗಿ ಸರ್ಕಾರ ಪರ್ಯಾಯ ವ್ಯವಸ್ಥೆಗಳನ್ನು ಸಹ ಮಾಡಿದೆ. ನಿಮ್ಮ ಹತ್ತಿರದ ಈ ಕೆಳಗಿನ ಸೇವಾ ಕೇಂದ್ರಗಳಿಗೆ ಭೇಟಿ ನೀಡಿ ನಿಗದಿತ ಶುಲ್ಕ ಪಾವತಿಸಿ ಅರ್ಜಿ ಸಲ್ಲಿಸಬಹುದು:

• ಗ್ರಾಮ ಪಂಚಾಯಿತಿ ಬಾಪೂಜಿ ಸೇವಾ ಕೇಂದ್ರ (Bapuji Seva Kendra)
• ಗ್ರಾಮ ಒನ್ (Grama One)
• ಬೆಂಗಳೂರು ಒನ್ (Bengaluru One)
• ಕರ್ನಾಟಕ ಒನ್ (Karnataka One)

ಶುಲ್ಕದ ವಿವರಗಳು (Service Charges):

• ಗ್ರಾಮ ಒನ್ / ಬೆಂಗಳೂರು ಒನ್ ಅರ್ಜಿ ಶುಲ್ಕ: ₹45/-
• ಸ್ಕ್ಯಾನಿಂಗ್ ಮತ್ತು ಪ್ರಿಂಟಿಂಗ್ ಶುಲ್ಕ: ಪ್ರತಿ ಪುಟಕ್ಕೆ ₹5/-

Apply for E-Swattu online now

ಮೊಬೈಲ್‌ನಲ್ಲೇ ಇ-ಸ್ವತ್ತಿಗೆ ಅರ್ಜಿ ಸಲ್ಲಿಸುವುದು ಹೇಗೆ? (Detailed Step-by-Step Guide)

ನಾಗರಿಕರು ಕಚೇರಿಗೆ ಅಲೆಯದೆ, ತಮ್ಮ ಸ್ಮಾರ್ಟ್‌ಫೋನ್ ಮೂಲಕವೇ ಅತ್ಯಂತ ಸರಳವಾಗಿ ಇ-ಸ್ವತ್ತು ದಾಖಲೆಗೆ (ನಮೂನೆ 11A / 11B) ಅರ್ಜಿ ಸಲ್ಲಿಸಲು ಈ ಕೆಳಗಿನ ಹಂತಗಳನ್ನು ಅನುಸರಿಸಿ:

ಹಂತ 1 : ಅಧಿಕೃತ ವೆಬ್‌ಸೈಟ್‌ಗೆ ಭೇಟಿ ನೀಡಿ ಮೊದಲಿಗೆ ನಿಮ್ಮ ಮೊಬೈಲ್‌ನ ಬ್ರೌಸರ್ (ಉದಾಹರಣೆಗೆ: Google Chrome) ಓಪನ್ ಮಾಡಿ, ಇ-ಸ್ವತ್ತಿನ ಅಧಿಕೃತ ವೆಬ್‌ಸೈಟ್ https://eswathu.karnataka.gov.in ಗೆ ಭೇಟಿ ನೀಡಿ. (ಪ್ರೋ-ಟಿಪ್: ಮೊಬೈಲ್‌ನಲ್ಲಿ ಪರದೆ ಸರಿಯಾಗಿ ಮತ್ತು ಪೂರ್ಣವಾಗಿ ಕಾಣಲು, ಬ್ರೌಸರ್‌ನ ಬಲಭಾಗದಲ್ಲಿರುವ ಮೂರು ಚುಕ್ಕೆಗಳ ಮೇಲೆ ಕ್ಲಿಕ್ ಮಾಡಿ ‘Desktop Site’ ಆಯ್ಕೆಯನ್ನು ಆನ್ ಮಾಡಿಕೊಳ್ಳುವುದು ಉತ್ತಮ).

ಹಂತ 2: ನಾಗರಿಕ ಲಾಗಿನ್ (Citizen Login) ಮುಖಪುಟದಲ್ಲಿ ಎಡಬದಿಯಲ್ಲಿ ಕಾಣಿಸುವ ‘ನಾಗರಿಕ ಲಾಗಿನ್’ (Citizen Login) ಬಟನ್ ಮೇಲೆ ಕ್ಲಿಕ್ ಮಾಡಿ. ಅಲ್ಲಿ ‘Citizen’ ಆಯ್ಕೆಯನ್ನು ಆರಿಸಿಕೊಂಡು, ನಿಮ್ಮ 10 ಅಂಕಿಯ ಮೊಬೈಲ್ ನಂಬರ್ ಹಾಗೂ ಅಲ್ಲಿಯೇ ಕಾಣುವ ಭದ್ರತಾ ಕೋಡ್ (Captcha) ಅನ್ನು ನಮೂದಿಸಿ, ‘Send OTP’ ಬಟನ್ ಮೇಲೆ ಕ್ಲಿಕ್ ಮಾಡಿ.

ಹಂತ 3: ಓಟಿಪಿ (OTP) ದೃಢೀಕರಣ ನಿಮ್ಮ ಮೊಬೈಲ್ ಸಂಖ್ಯೆಗೆ 6 ಅಂಕಿಗಳ ಓಟಿಪಿ (OTP) ಬರುತ್ತದೆ. ಅದನ್ನು ನಮೂದಿಸಿ ತಂತ್ರಾಂಶದ ಒಳಗೆ ‘ಲಾಗಿನ್’ (Login) ಆಗಿ.

ಹಂತ 4 (Step-4): ಅರ್ಜಿ ನಮೂನೆ ಮತ್ತು ಆಸ್ತಿ ವಿವರಗಳ ಆಯ್ಕೆ ಲಾಗಿನ್ ಆದ ನಂತರ ಡ್ಯಾಶ್‌ಬೋರ್ಡ್‌ನಲ್ಲಿ ‘ಹೊಸ ಅರ್ಜಿ’ (New Application) ಅಥವಾ ನೀವು ಪಡೆಯಬೇಕಾದ ‘ನಮೂನೆ’ಯ (Form 11A / 11B) ಆಯ್ಕೆಯನ್ನು ಆರಿಸಿಕೊಳ್ಳಿ. ನಂತರ ನಿಮ್ಮ ಆಸ್ತಿ ಇರುವ ಜಿಲ್ಲೆ, ತಾಲೂಕು, ಗ್ರಾಮ ಪಂಚಾಯಿತಿ ಮತ್ತು ಗ್ರಾಮವನ್ನು ಸರಿಯಾಗಿ ಆಯ್ಕೆ ಮಾಡಬೇಕು.

ಹಂತ 5 (Step-5): ಆಸ್ತಿಯ ಸಂಪೂರ್ಣ ವಿವರಗಳ ಭರ್ತಿ ತೆರೆದುಕೊಳ್ಳುವ ಅರ್ಜಿಯಲ್ಲಿ ನಿಮ್ಮ ಆಸ್ತಿಯ ನಿಖರವಾದ ವಿವರಗಳನ್ನು ಎಚ್ಚರಿಕೆಯಿಂದ ತುಂಬಬೇಕು. (ಉದಾಹರಣೆಗೆ: ಆಸ್ತಿಯ ಅಳತೆ, ಪೂರ್ವ-ಪಶ್ಚಿಮ-ಉತ್ತರ-ದಕ್ಷಿಣದ ಚಕ್ಕುಬಂದಿ, ಮಾಲೀಕರ ಹೆಸರು ಹಾಗೂ ಈ ಹಿಂದಿನ ಆಸ್ತಿ ಸಂಖ್ಯೆ ಇದ್ದರೆ ಅದರ ವಿವರಗಳನ್ನು ನಮೂದಿಸಿ).

ಈ ತಂತ್ರಾಂಶದಲ್ಲಿ ನಿಮ್ಮ ಹೆಸರು ನಮೂದಿಸುವ ಮೂಲಕ ಆಸ್ತಿ ವಿವರಗಳನ್ನು ಹುಡುಕಿ, ‘ಇ-ಖಾತೆ’ಯನ್ನು ಡೌನ್‌ಲೋಡ್ ಮಾಡಿಕೊಳ್ಳಬಹುದು. ಅಷ್ಟೇ ಅಲ್ಲದೆ, ಪ್ರಸಕ್ತ ಸಾಲಿನ ಕಂದಾಯ ಬಾಕಿ ಇದ್ದರೆ, ಡೌನ್‌ಲೋಡ್ ಶುಲ್ಕದೊಂದಿಗೆ ಆ ಮೊತ್ತವನ್ನೂ ನಿಮ್ಮ ಮೊಬೈಲ್‌ನಲ್ಲೇ ಪಾವತಿಸಲು ಅವಕಾಶವಿದೆ

ಹಂತ 6 (Step-6): ಅಗತ್ಯ ದಾಖಲೆಗಳ ಅಪ್ಲೋಡ್ (Document Upload) ಕೇವಲ ವಿವರಗಳನ್ನು ತುಂಬಿದರೆ ಸಾಲದು, ಅದಕ್ಕೆ ಪೂರಕವಾದ ಮೂಲ ದಾಖಲೆಗಳ ಸ್ಕ್ಯಾನ್ ಕಾಪಿ ಅಥವಾ ಸ್ಪಷ್ಟವಾದ ಫೋಟೋಗಳನ್ನು ಅಪ್ಲೋಡ್ ಮಾಡುವುದು ಕಡ್ಡಾಯ. (ಅಗತ್ಯವಿರುವ ದಾಖಲೆಗಳು: ನೋಂದಾಯಿತ ಕ್ರಯಪತ್ರ (Sale Deed), ನಿಮ್ಮ ಆಧಾರ್ ಕಾರ್ಡ್, ಹಳೆಯ ತೆರಿಗೆ ಪಾವತಿಸಿದ ರಸೀದಿಗಳು ಮತ್ತು ಆಸ್ತಿಯ ಫೋಟೋ).

ಹಂತ 7 (Step-7): ಸಲ್ಲಿಕೆ ಮತ್ತು ‘ಅರ್ಜಿ ಸಂಖ್ಯೆ’ ಸ್ವೀಕೃತಿ (Submit & Acknowledgement) ಎಲ್ಲಾ ವಿವರಗಳನ್ನು ಮತ್ತು ಅಪ್ಲೋಡ್ ಮಾಡಿದ ದಾಖಲೆಗಳನ್ನು ಮತ್ತೊಮ್ಮೆ ಪರಿಶೀಲಿಸಿ, ಕೊನೆಯಲ್ಲಿ “Submit” (ಸಲ್ಲಿಸಿ) ಬಟನ್ ಮೇಲೆ ಕ್ಲಿಕ್ ಮಾಡಿ. ನಿಮ್ಮ ಅರ್ಜಿ ಯಶಸ್ವಿಯಾಗಿ ಸಲ್ಲಿಕೆಯಾದ ತಕ್ಷಣ ಸ್ಕ್ರೀನ್ ಮೇಲೆ ಒಂದು ‘ಅರ್ಜಿ ಉಲ್ಲೇಖ ಸಂಖ್ಯೆ’ (Application Reference Number) ಬರುತ್ತದೆ.

ಮುಖ್ಯ ಸೂಚನೆ: ಈ ಅರ್ಜಿ ಸಂಖ್ಯೆಯನ್ನು ಕಡ್ಡಾಯವಾಗಿ ಬರೆದಿಟ್ಟುಕೊಳ್ಳಿ ಅಥವಾ ಸ್ಕ್ರೀನ್‌ಶಾಟ್ ತೆಗೆದುಕೊಳ್ಳಿ. ಮುಂದಿನ ದಿನಗಳಲ್ಲಿ ನಿಮ್ಮ ಅರ್ಜಿಯ ಸ್ಥಿತಿ (Status) ಏನಾಗಿದೆ ಅಥವಾ ಅದು ಯಾವ ಅಧಿಕಾರಿಯ ಬಳಿ ಇದೆ ಎಂದು ಆನ್‌ಲೈನ್‌ನಲ್ಲೇ ಟ್ರ್ಯಾಕ್ ಮಾಡಲು ಈ ಸಂಖ್ಯೆ ಅತ್ಯಗತ್ಯ.

ಕೊನೆಯ ಮಾತು

ಭೂಮಿ ಮತ್ತು ಆಸ್ತಿ ದಾಖಲೆಗಳ ವಿಚಾರದಲ್ಲಿ ಗ್ರಾಮೀಣ ಭಾಗದ ಜನರನ್ನು ಮಧ್ಯವರ್ತಿಗಳು ಶೋಷಣೆ ಮಾಡುವುದು ಸಾಮಾನ್ಯ ಸಂಗತಿಯಾಗಿತ್ತು. ‘ಇ-ಸ್ವತ್ತು 2.0’ ಜಾರಿಗೆ ತರುವ ಮೂಲಕ ಆಡಳಿತ ವ್ಯವಸ್ಥೆಯನ್ನು ಜನರ ಮನೆಬಾಗಿಲಿಗೇ ತರುವ ನಿಟ್ಟಿನಲ್ಲಿ ಸರ್ಕಾರ ಮಹತ್ತರ ಹೆಜ್ಜೆ ಇಟ್ಟಿದೆ. ಸಾರ್ವಜನಿಕರು ಈ ತಂತ್ರಜ್ಞಾನದ ಸದುಪಯೋಗ ಪಡಿಸಿಕೊಂಡು, ತಮ್ಮ ಆಸ್ತಿಯ ಭದ್ರತೆ ಮತ್ತು ಕಾನೂನಾತ್ಮಕ ಹಕ್ಕುಗಳನ್ನು ಕಾಪಾಡಿಕೊಳ್ಳಬೇಕು.

Apply for E-Swattu online now

ಈ ಮಾಹಿತಿಗಳನ್ನು ಓದಿ

ದಯವಿಟ್ಟು ಗಮನಿಸಿ: ನೀಡ್ಸ್ ಆಫ್ ಪಬ್ಲಿಕ್ ತನ್ನ ಓದುಗರಿಗೆ ನಿಖರವಾದ ಮತ್ತು ಅಧಿಕೃತ ಮಾಹಿತಿಗಳನ್ನು ಮಾತ್ರ ಪ್ರಕಟಿಸುತ್ತದೆ. ಇಲ್ಲಿ ನಾವು ಯಾವುದೇ ಅನಧಿಕೃತ ಮತ್ತು ಸುಳ್ಳು ಮಾಹಿತಿ ಬಿತ್ತರಿಸುವುದಿಲ್ಲ.

ಲಿಂಗರಾಜ ರಾಮಪುರ

ಲಿಂಗರಾಜ್ ರಾಮಾಪುರ ಅವರು BCA, MCA ಹಾಗೂ ಧಾರವಾಡದ ಕರ್ನಾಟಕ ವಿಶ್ವವಿದ್ಯಾಲಯದಿಂದ ಪತ್ರಿಕೋದ್ಯಮದಲ್ಲಿ ಸ್ನಾತಕೋತ್ತರ ಪದವಿ (MA) ಪಡೆದಿದ್ದಾರೆ. ಈ ಹಿಂದೆ ಬೆಂಗಳೂರಿನ Infosys ಮತ್ತು Concentrix ಸಂಸ್ಥೆಗಳಲ್ಲಿ 6 ವರ್ಷಗಳ ಕಾಲ ವೃತ್ತಿಪರ ಅನುಭವ ಹೊಂದಿರುವ ಇವರು, ತಾಂತ್ರಿಕ ಜ್ಞಾನವನ್ನು ಪತ್ರಿಕೋದ್ಯಮಕ್ಕೆ ಅನ್ವಯಿಸಿದ ಪರಿಣತರು.

ವೃತ್ತಿಪರ ಹಾದಿ: 2017 ರಲ್ಲಿ ಐಟಿ ವೃತ್ತಿಜೀವನದ ಜೊತೆಗೇ ಡಿಜಿಟಲ್ ಮಾಧ್ಯಮ ಕ್ಷೇತ್ರಕ್ಕೆ ಕಾಲಿಟ್ಟ ಇವರು, ಪ್ರಸ್ತುತ NeedsOfPublic.in ನ ಎಡಿಟೋರಿಯಲ್ ಸ್ಟ್ರಾಟಜಿಯನ್ನು ಮುನ್ನಡೆಸುತ್ತಿದ್ದಾರೆ. ಡೇಟಾ-ಆಧಾರಿತ ವರದಿಗಾರಿಕೆ, ಮಾರುಕಟ್ಟೆ ವಿಶ್ಲೇಷಣೆ ಮತ್ತು ಸಾರ್ವಜನಿಕರಿಗೆ ಉಪಯುಕ್ತವಾಗುವ ನಿಖರ ಮಾಹಿತಿಯನ್ನು ತಲುಪಿಸುವುದು ಇವರ ಮುಖ್ಯ ಗುರಿ. ಡಿಜಿಟಲ್ ಪತ್ರಿಕೋದ್ಯಮದಲ್ಲಿ ಇವರಿಗೆ 9 ವರ್ಷಗಳ ಸುದೀರ್ಘ ಅನುಭವವಿದೆ.