₹1.80 ಲಕ್ಷದತ್ತ ಚಿನ್ನದ ಓಟ? ಮುಂದಿನ 5 ವರ್ಷಗಳ ಮಾರುಕಟ್ಟೆ ಟ್ರೆಂಡ್ ವಿಶ್ಲೇಷಣೆ

2030ರ ವೇಳೆಗೆ 10 ಗ್ರಾಂ ಚಿನ್ನದ ಬೆಲೆ ಎಷ್ಟಾಗಲಿದೆ ಗೊತ್ತಾ? ಕಳೆದ 15 ವರ್ಷಗಳಲ್ಲಿ 560% ಏರಿಕೆ ಕಂಡಿರುವ ಬಂಗಾರದ ಭವಿಷ್ಯ, ಕಾರಣಗಳು ಹಾಗೂ ಸ್ಮಾರ್ಟ್ ಹೂಡಿಕೆಯ ಎಕ್ಸ್‌ಪರ್ಟ್ ಟಿಪ್ಸ್ ಇಲ್ಲಿದೆ.

ಭಾರತೀಯರಿಗೆ ಬಂಗಾರ ಕೇವಲ ಹಳದಿ ಬಣ್ಣದ ಲೋಹವಲ್ಲ ಅದೊಂದು ಪವಿತ್ರ ಭಾವನೆ, ಅಂತಸ್ತಿನ ಸಂಕೇತ ಹಾಗೂ ಕಷ್ಟಕಾಲಕ್ಕೆ ಹೆಗಲು ಕೊಡುವ ಆಪತ್ಬಾಂಧವ. ನಮ್ಮ ಮನೆಗಳಲ್ಲಿ ಅಮ್ಮಂದಿರು, ಅಜ್ಜಿಯರು ಯಾವಾಗಲೂ ಹೇಳುವ ಒಂದು ಮಾತಿದೆ- ಕೈಯಲ್ಲಿ ನಾಲ್ಕು ಕಾಸಿದ್ದಾಗ ಒಂದೆರಡು ಗ್ರಾಂ ಬಂಗಾರ ತಗೊಂಡು ಇಡು, ಮುಂದೊಂದು ದಿನ ಕಷ್ಟ ಕಾಲಕ್ಕೆ ಆಗುತ್ತೆ ಅಂತಾ.

ಅವರು ಹೇಳಿದ್ದು ನೂರಕ್ಕೆ ನೂರು ಸತ್ಯ ಎಂಬುದು ಈಗ ಮಾರುಕಟ್ಟೆಯಲ್ಲಿ ನಿತ್ಯ ಸಾಬೀತಾಗುತ್ತಿದೆ. ಒಂದು ಕಾಲದಲ್ಲಿ ಕೇವಲ ಆಭರಣವಾಗಿ, ಮದುವೆ-ಮುಂಜಿಗಳಿಗೆ ಮಾತ್ರ ಸೀಮಿತವಾಗಿದ್ದ ಚಿನ್ನ, ಇಂದು ಜಾಗತಿಕ ಮಟ್ಟದ ಅತಿ ದೊಡ್ಡ ಮತ್ತು ಸುರಕ್ಷಿತ ಹೂಡಿಕೆಯ (Safe Haven) ಅಸ್ತ್ರವಾಗಿ ಬದಲಾಗಿದೆ.

ಷೇರುಪೇಟೆಯಲ್ಲಿ ರಕ್ತಪಾತವಾದರೂ, ರಿಯಲ್ ಎಸ್ಟೇಟ್ ಮಾರುಕಟ್ಟೆ ಮಕಾಡೆ ಮಲಗಿದರೂ ಚಿನ್ನದ ಮಾರುಕಟ್ಟೆ ಮಾತ್ರ ತನ್ನ ಹೊಳಪನ್ನು ಕಳೆದುಕೊಳ್ಳುವುದಿಲ್ಲ. ನಿಮಗೆ ನೆನಪಿರಬಹುದು, 2010 ರಲ್ಲಿ ಕೇವಲ ₹18,500 ರಷ್ಟಿದ್ದ 10 ಗ್ರಾಂ ಚಿನ್ನದ ಬೆಲೆ, 2025 ರ ಹೊತ್ತಿಗೆ ಸರಿಸುಮಾರು ₹1,23,000 ಗಡಿ ತಲುಪಿದೆ. ಅಂದರೆ ಕೇವಲ 15 ವರ್ಷಗಳಲ್ಲಿ ಬರೋಬ್ಬರಿ ಶೇ. 560 ರಷ್ಟು ಏರಿಕೆ! ಹಾಗಾದರೆ, ಮುಂದಿನ 5 ವರ್ಷಗಳಲ್ಲಿ (2026-2030) ಚಿನ್ನದ ಬೆಲೆ ಎಲ್ಲಿಗೆ ತಲುಪಬಹುದು? ಈ ಬಗ್ಗೆ ಮಾರುಕಟ್ಟೆ ತಜ್ಞರ ಸಂಪೂರ್ಣ ಲೆಕ್ಕಾಚಾರ ಇಲ್ಲಿದೆ.

ಈ ಮೇಲಿನ ಪಟ್ಟಿಯನ್ನು ನೋಡಿದರೆ ಒಂದು ವಿಚಾರ ಸ್ಪಷ್ಟವಾಗುತ್ತದೆ. ಎಷ್ಟೇ ಏರಿಳಿತಗಳಾದರೂ ಚಿನ್ನದ ಬೆಲೆ ದೀರ್ಘಾವಧಿಯಲ್ಲಿ ಮೇಲ್ಮುಖವಾಗಿಯೇ ಚಲಿಸಿದೆ.

ಚಿನ್ನದ ಬೆಲೆ ರಾಕೆಟ್ ವೇಗದಲ್ಲಿ ಏರುತ್ತಿರುವುದೇಕೆ?

ಬಂಗಾರದ ಬೆಲೆ ಏರಿಕೆಯ ಹಿಂದೆ ಕೇವಲ ನಮ್ಮ ಮದುವೆ ಸೀಸನ್‌ಗಳ ಡಿಮ್ಯಾಂಡ್ ಮಾತ್ರವಲ್ಲ, ಜಾಗತಿಕ ಮಟ್ಟದ ದೊಡ್ಡ ಆರ್ಥಿಕ ಆಟವೇ ಅಡಗಿದೆ:

1. ಹಣದುಬ್ಬರ (Rising Inflation): ದಿನಬಳಕೆ ವಸ್ತುಗಳ ಬೆಲೆ ಏರಿದಂತೆ, ಕಾಗದದ ಹಣದ ಮೌಲ್ಯ ಕುಸಿಯುತ್ತದೆ. ಆಗ ಹೂಡಿಕೆದಾರರು ತಮ್ಮ ಹಣದ ಮೌಲ್ಯವನ್ನು ಕಾಪಾಡಿಕೊಳ್ಳಲು (Store of value) ಚಿನ್ನದ ಮೊರೆ ಹೋಗುತ್ತಾರೆ.
2. ರೂಪಾಯಿ ಮೌಲ್ಯ ಕುಸಿತ (Rupee Depreciation): ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯ ಕುಸಿದಾಗ, ನಾವು ವಿದೇಶದಿಂದ ಆಮದು ಮಾಡಿಕೊಳ್ಳುವ ಚಿನ್ನದ ಬೆಲೆ ತಾನಾಗಿಯೇ ದುಬಾರಿಯಾಗುತ್ತದೆ. ಭಾರತವು ಚಿನ್ನವನ್ನು ಅತಿ ಹೆಚ್ಚು ಆಮದು ಮಾಡಿಕೊಳ್ಳುವ ದೇಶವಾಗಿದೆ.
3. ಜಾಗತಿಕ ಯುದ್ಧದ ಭೀತಿ (Geopolitical Tensions): ರಷ್ಯಾ-ಉಕ್ರೇನ್, ಇಸ್ರೇಲ್-ಹಮಾಸ್‌ನಂತಹ ಯುದ್ಧಗಳು, ಹಾಗೂ ಆರ್ಥಿಕ ಹಿಂಜರಿತದ ಭೀತಿ ಎದುರಾದಾಗ, ವಿಶ್ವದ ದೊಡ್ಡ ದೊಡ್ಡ ಬ್ಯಾಂಕ್‌ಗಳು (Central Banks) ಟನ್ ಗಟ್ಟಲೆ ಚಿನ್ನವನ್ನು ಖರೀದಿಸಿ ರಿಸರ್ವ್ ಇಟ್ಟುಕೊಳ್ಳುತ್ತಿವೆ. ಇದರಿಂದ ಮಾರುಕಟ್ಟೆಯಲ್ಲಿ ಚಿನ್ನದ ಕೊರತೆ ಸೃಷ್ಟಿಯಾಗಿ ಬೆಲೆ ಗಗನಕ್ಕೇರುತ್ತಿದೆ.
4. ಗಣಿಗಾರಿಕೆ ವೆಚ್ಚ (Limited Supply): ಭೂಮಿಯಡಿಯಿಂದ ಚಿನ್ನವನ್ನು ತೆಗೆಯುವ ಪ್ರಕ್ರಿಯೆ ದಿನೇ ದಿನೇ ಕಷ್ಟಕರವಾಗುತ್ತಿದೆ ಮತ್ತು ದುಬಾರಿಯಾಗುತ್ತಿದೆ. ಪೂರೈಕೆ ಕಡಿಮೆಯಾಗಿ ಬೇಡಿಕೆ ಹೆಚ್ಚಾದಾಗ ಬೆಲೆ ಏರುವುದು ಸಹಜ ಪ್ರಕ್ರಿಯೆ.

ಮುಂದಿನ 5 ವರ್ಷಗಳ ಚಿನ್ನದ ಬೆಲೆ ಮುನ್ಸೂಚನೆ (2026–2030)

ಮಾರುಕಟ್ಟೆ ವಿಶ್ಲೇಷಣೆ, ಹಣದುಬ್ಬರದ ಸರಾಸರಿ ಏರಿಕೆ ಹಾಗೂ ಗಣಿಗಾರಿಕೆ ವೆಚ್ಚವನ್ನು ಲೆಕ್ಕಹಾಕಿ ಮುಂದಿನ 5 ವರ್ಷಗಳ ಚಿನ್ನದ ಬೆಲೆಯ ಅಂದಾಜು ಪಟ್ಟಿಯನ್ನು ತಜ್ಞರು ಸಿದ್ಧಪಡಿಸಿದ್ದಾರೆ. ಈ ಬೆಲೆಗಳು ಖಚಿತವಲ್ಲದಿದ್ದರೂ, ಮಾರುಕಟ್ಟೆಯ ಟ್ರೆಂಡ್ ಅನ್ನು ಸ್ಪಷ್ಟವಾಗಿ ಸೂಚಿಸುತ್ತವೆ.

1. 2026ರ ಮುನ್ಸೂಚನೆ (₹1,28,000 – ₹1,38,000) ರೂಪಾಯಿ ಮೌಲ್ಯದ ಕುಸಿತ ಮತ್ತು ಏಷ್ಯಾ ಮಾರುಕಟ್ಟೆಯಲ್ಲಿನ ಸ್ಥಿರ ಬೇಡಿಕೆಯಿಂದಾಗಿ 2026ರಲ್ಲಿ 24 ಕ್ಯಾರೆಟ್‌ನ 10 ಗ್ರಾಂ ಚಿನ್ನದ ಬೆಲೆ ಗರಿಷ್ಠ 1.38 ಲಕ್ಷ ರೂಪಾಯಿ ಮುಟ್ಟುವ ಸಾಧ್ಯತೆಯಿದೆ. ಇದೇ ವೇಳೆ 22 ಕ್ಯಾರೆಟ್ ಆಭರಣ ಚಿನ್ನದ ಬೆಲೆ 1.27 ಲಕ್ಷದ ಆಸುಪಾಸಿನಲ್ಲಿರಲಿದೆ.

2. 2027ರ ಮುನ್ಸೂಚನೆ (₹1,35,000 – ₹1,47,000) ಷೇರುಪೇಟೆಯಲ್ಲಿನ ಏರಿಳಿತಗಳು ಹಾಗೂ ವಿವಿಧ ದೇಶಗಳ ಸೆಂಟ್ರಲ್ ಬ್ಯಾಂಕ್‌ಗಳ ನಿರಂತರ ಚಿನ್ನದ ಖರೀದಿಯಿಂದಾಗಿ 2027ರಲ್ಲಿ ಚಿನ್ನವು ಹೊಸ ದಾಖಲೆ ಬರೆಯಲಿದೆ.

3. 2028ರ ಮುನ್ಸೂಚನೆ (₹1,43,000 – ₹1,57,000) ಗಣಿಗಾರಿಕೆ ಪೂರೈಕೆಯಲ್ಲಿನ ತೀವ್ರ ಕೊರತೆ ಹಾಗೂ ಹೂಡಿಕೆದಾರರ ಭಾರಿ ಬೇಡಿಕೆಯಿಂದಾಗಿ 2028ರ ವೇಳೆಗೆ 10 ಗ್ರಾಂ ಚಿನ್ನದ ಬೆಲೆ 1.5 ಲಕ್ಷ ರೂಪಾಯಿ ಗಡಿಯನ್ನು ಸುಲಭವಾಗಿ ದಾಟಲಿದೆ ಎಂದು ಆರ್ಥಿಕ ತಜ್ಞರು ವಿಶ್ಲೇಷಿಸಿದ್ದಾರೆ.

4. 2029ರ ಮುನ್ಸೂಚನೆ (₹1,52,000 – ₹1,68,000) ಭಾರತ ಹಾಗೂ ಚೀನಾದಲ್ಲಿ ಚಿನ್ನದ ಮೇಲಿನ ವ್ಯಾಮೋಹ ಎಂದಿಗೂ ಕಡಿಮೆಯಾಗುವುದಿಲ್ಲ. ವಿಪರೀತ ಮದುವೆ ಸೀಸನ್ ಹಾಗೂ ಏಷ್ಯನ್ ಮಾರುಕಟ್ಟೆಯ ಬೇಡಿಕೆಯಿಂದಾಗಿ 2029ರಲ್ಲಿ ಚಿನ್ನವು 1.68 ಲಕ್ಷ ರೂಪಾಯಿ ತಲುಪಬಹುದು.

5. 2030ರ ಮುನ್ಸೂಚನೆ (₹1,62,000 – ₹1,80,000) ದೀರ್ಘಾವಧಿಯ ಹಣದುಬ್ಬರ, ನಿರಂತರ ಜಾಗತಿಕ ಆರ್ಥಿಕ ಅಸ್ಥಿರತೆ ಮತ್ತು ಸೀಮಿತ ಪೂರೈಕೆಯ ಕಾರಣಗಳಿಂದ 2030ರ ದಶಕದ ಆರಂಭದಲ್ಲಿ 10 ಗ್ರಾಂ ಚಿನ್ನವು ಬರೋಬ್ಬರಿ ₹1,80,000 ರೂಪಾಯಿಗಳ ಭಾರಿ ಗಡಿಯನ್ನು ಮುಟ್ಟಲಿದೆ.

ಚಿನ್ನದ ಮೇಲೆ ಹೂಡಿಕೆ ಮಾಡಲು ಎಕ್ಸ್‌ಪರ್ಟ್ ಟಿಪ್ಸ್

ನೀವು ಭವಿಷ್ಯಕ್ಕಾಗಿ ಚಿನ್ನದ ಮೇಲೆ ಹೂಡಿಕೆ ಮಾಡಲು ಯೋಚಿಸುತ್ತಿದ್ದರೆ, ಕೇವಲ ಜ್ಯುವೆಲ್ಲರಿ ಶಾಪ್‌ಗೆ ಹೋಗಿ ಒಡವೆ ಮಾಡಿಸುವುದಷ್ಟೇ ಹೂಡಿಕೆಯಲ್ಲ. ಅದಕ್ಕಿಂತಲೂ ಲಾಭದಾಯಕವಾದ ಸ್ಮಾರ್ಟ್ ಐಡಿಯಾಗಳು ಇಲ್ಲಿವೆ:

• ಒಡವೆ ಬದಲು SGB ಖರೀದಿಸಿ: ಕೇಂದ್ರ ಸರ್ಕಾರವೇ ಹೊರಡಿಸುವ ‘ಸಾವರಿನ್ ಗೋಲ್ಡ್ ಬಾಂಡ್’ (Sovereign Gold Bonds – SGB) ಗಳಲ್ಲಿ ಹೂಡಿಕೆ ಮಾಡಿದರೆ, ಮೇಕಿಂಗ್ ಚಾರ್ಜ್, ವೇಸ್ಟೇಜ್ ಮತ್ತು ಕಳ್ಳತನದ ಭಯ ಇರುವುದಿಲ್ಲ. ಜೊತೆಗೆ ಪ್ರತಿ ವರ್ಷ 2.5% ಹೆಚ್ಚುವರಿ ಬಡ್ಡಿಯೂ ನಿಮ್ಮ ಬ್ಯಾಂಕ್ ಖಾತೆಗೆ ಜಮೆಯಾಗುತ್ತದೆ. 8 ವರ್ಷಗಳ ಮೆಚ್ಯೂರಿಟಿ ಬಳಿಕ ಬರುವ ಹಣಕ್ಕೆ ಕ್ಯಾಪಿಟಲ್ ಗೇನ್ ಟ್ಯಾಕ್ಸ್ ಕೂಡ ಇರುವುದಿಲ್ಲ.
• ಗೋಲ್ಡ್ ಇಟಿಎಫ್ (Gold ETFs): ಷೇರುಪೇಟೆಯ ಮೂಲಕ ಚಿನ್ನದಲ್ಲಿ ಹೂಡಿಕೆ ಮಾಡುವ ಅತ್ಯುತ್ತಮ ವಿಧಾನವಿದು. ಇದನ್ನು ಡಿಮ್ಯಾಟ್ ಖಾತೆಯ ಮೂಲಕ ಸುಲಭವಾಗಿ ಖರೀದಿಸಬಹುದು ಮತ್ತು ಯಾವಾಗ ಬೇಕಾದರೂ ಮಾರಾಟ ಮಾಡಿ ಹಣ ಪಡೆಯಬಹುದು (High Liquidity).
• ಡಿಜಿಟಲ್ ಗೋಲ್ಡ್ (Digital Gold): ನಿಮ್ಮ ಬಳಿ ಸಾವಿರಾರು ರೂಪಾಯಿ ಇಲ್ಲದಿದ್ದರೂ ಪರವಾಗಿಲ್ಲ. ಫೋನ್‌ಪೇ, ಗೂಗಲ್ ಪೇ ಅಥವಾ ಪೇಟಿಎಂ ಮೂಲಕ ಕೇವಲ ₹100 ಗೂ 24K ಡಿಜಿಟಲ್ ಚಿನ್ನವನ್ನು ಖರೀದಿಸಿ ಸೇಫ್ ಆಗಿ ಕೂಡಿಡಬಹುದು.
• SIP ಮೂಲಕ ಹೂಡಿಕೆ ಮಾಡಿ: ಚಿನ್ನದ ಬೆಲೆ ಇಳಿಕೆಯಾಗಲಿ ಎಂದು ಕಾಯುತ್ತಾ ಕೂರುವ ಬದಲು, ಪ್ರತಿ ತಿಂಗಳು ನಿರ್ದಿಷ್ಟ ಮೊತ್ತವನ್ನು (SIP ಮಾದರಿಯಲ್ಲಿ) ಹೂಡಿಕೆ ಮಾಡುತ್ತಾ ಬನ್ನಿ. ಚಿನ್ನದ ಬೆಲೆ ಸ್ವಲ್ಪ ಇಳಿಕೆಯಾದಾಗಲೆಲ್ಲಾ (Buy on Dips) ಸ್ವಲ್ಪ-ಸ್ವಲ್ಪವೇ ಖರೀದಿಸುವ ಅಭ್ಯಾಸ ಮಾಡಿಕೊಂಡರೆ, ಕನಿಷ್ಠ 5 ವರ್ಷಗಳ ನಂತರ ಅತ್ಯುತ್ತಮ ಲಾಭ ನಿಮ್ಮದಾಗುತ್ತದೆ.

ನೀಡ್ಸ್ ಆಫ್ ಪಬ್ಲಿಕ್ ಒಳನೋಟ:

ಮಧ್ಯಮ ವರ್ಗದ ಕುಟುಂಬಗಳು ಈಗ ಬಂಗಾರದ ಹೂಡಿಕೆಯ ಶೈಲಿಯನ್ನು ಬದಲಾಯಿಸಿಕೊಳ್ಳಬೇಕಾದ ಅನಿವಾರ್ಯತೆ ಇದೆ. ನಾವು ದೈನಂದಿನ ಮಾರುಕಟ್ಟೆ ದರಗಳನ್ನು (Commodity rates) ನಿರಂತರವಾಗಿ ಗಮನಿಸುತ್ತಿರುವುದರಿಂದ ಒಂದು ವಿಚಾರ ಸ್ಪಷ್ಟವಾಗುತ್ತದೆ; ಕೇವಲ ಪ್ರದರ್ಶನಕ್ಕಾಗಿ ಆಭರಣಗಳ ರೂಪದಲ್ಲಿ ಬಂಗಾರ ಖರೀದಿಸಿದಾಗ ಶೇ. 15-20 ರಷ್ಟು ಹಣ ಕೇವಲ ಮೇಕಿಂಗ್ ಚಾರ್ಜ್, ವೇಸ್ಟೇಜ್ ಮತ್ತು ಟ್ಯಾಕ್ಸ್‌ಗೆ ಕರಗಿಹೋಗುತ್ತದೆ.

ಇದರ ಬದಲಾಗಿ, ಮಕ್ಕಳ ಭವಿಷ್ಯಕ್ಕೆ ಅಥವಾ ಮುಂದಿನ ಮದುವೆ ಕಾರ್ಯಗಳಿಗೆ ಚಿನ್ನ ಕೂಡಿಡುವ ದಾವಣಗೆರೆ ಸೇರಿದಂತೆ ನಮ್ಮ ರಾಜ್ಯದ ಗ್ರಾಹಕರು, ಗೋಲ್ಡ್ ಇಟಿಎಫ್ (Gold ETFs) ಅಥವಾ ಕೇಂದ್ರ ಸರ್ಕಾರದ SGB ಗಳ ಕಡೆ ಮುಖ ಮಾಡುವುದು ಜಾಣತನ. 2030ರ ವೇಳೆಗೆ ಬಂಗಾರದ ಬೆಲೆ 1.8 ಲಕ್ಷ ತಲುಪುವ ಬಲವಾದ ಅಂದಾಜು ಇರುವುದರಿಂದ, ಚಿನ್ನವು ಎಂದಿಗೂ ಕೈಕೊಡದ ‘ಸಂಜೀವಿನಿ’ ಎಂಬುದಂತೂ ನೂರಕ್ಕೆ ನೂರು ಸತ್ಯ. ಕೇವಲ ಗಾಬರಿಬಿದ್ದು ಒಮ್ಮೆಲೆ ಸಾಲ ಮಾಡಿ ಖರೀದಿಸುವ ಬದಲು, ವ್ಯವಸ್ಥಿತವಾಗಿ ಪ್ರತಿ ತಿಂಗಳು ಹೂಡಿಕೆ ಮಾಡುವುದು ಆರ್ಥಿಕ ಶಿಸ್ತಿನ ಲಕ್ಷಣ.

ಈ ಮಾಹಿತಿಗಳನ್ನು ಓದಿ

ದಯವಿಟ್ಟು ಗಮನಿಸಿ: ನೀಡ್ಸ್ ಆಫ್ ಪಬ್ಲಿಕ್ ತನ್ನ ಓದುಗರಿಗೆ ನಿಖರವಾದ ಮತ್ತು ಅಧಿಕೃತ ಮಾಹಿತಿಗಳನ್ನು ಮಾತ್ರ ಪ್ರಕಟಿಸುತ್ತದೆ. ಇಲ್ಲಿ ನಾವು ಯಾವುದೇ ಅನಧಿಕೃತ ಮತ್ತು ಸುಳ್ಳು ಮಾಹಿತಿ ಬಿತ್ತರಿಸುವುದಿಲ್ಲ.

ಲಿಂಗರಾಜ ರಾಮಪುರ

ಲಿಂಗರಾಜ್ ರಾಮಾಪುರ ಅವರು BCA, MCA ಹಾಗೂ ಧಾರವಾಡದ ಕರ್ನಾಟಕ ವಿಶ್ವವಿದ್ಯಾಲಯದಿಂದ ಪತ್ರಿಕೋದ್ಯಮದಲ್ಲಿ ಸ್ನಾತಕೋತ್ತರ ಪದವಿ (MA) ಪಡೆದಿದ್ದಾರೆ. ಈ ಹಿಂದೆ ಬೆಂಗಳೂರಿನ Infosys ಮತ್ತು Concentrix ಸಂಸ್ಥೆಗಳಲ್ಲಿ 6 ವರ್ಷಗಳ ಕಾಲ ವೃತ್ತಿಪರ ಅನುಭವ ಹೊಂದಿರುವ ಇವರು, ತಾಂತ್ರಿಕ ಜ್ಞಾನವನ್ನು ಪತ್ರಿಕೋದ್ಯಮಕ್ಕೆ ಅನ್ವಯಿಸಿದ ಪರಿಣತರು.

ವೃತ್ತಿಪರ ಹಾದಿ: 2017 ರಲ್ಲಿ ಐಟಿ ವೃತ್ತಿಜೀವನದ ಜೊತೆಗೇ ಡಿಜಿಟಲ್ ಮಾಧ್ಯಮ ಕ್ಷೇತ್ರಕ್ಕೆ ಕಾಲಿಟ್ಟ ಇವರು, ಪ್ರಸ್ತುತ NeedsOfPublic.in ನ ಎಡಿಟೋರಿಯಲ್ ಸ್ಟ್ರಾಟಜಿಯನ್ನು ಮುನ್ನಡೆಸುತ್ತಿದ್ದಾರೆ. ಡೇಟಾ-ಆಧಾರಿತ ವರದಿಗಾರಿಕೆ, ಮಾರುಕಟ್ಟೆ ವಿಶ್ಲೇಷಣೆ ಮತ್ತು ಸಾರ್ವಜನಿಕರಿಗೆ ಉಪಯುಕ್ತವಾಗುವ ನಿಖರ ಮಾಹಿತಿಯನ್ನು ತಲುಪಿಸುವುದು ಇವರ ಮುಖ್ಯ ಗುರಿ. ಡಿಜಿಟಲ್ ಪತ್ರಿಕೋದ್ಯಮದಲ್ಲಿ ಇವರಿಗೆ 9 ವರ್ಷಗಳ ಸುದೀರ್ಘ ಅನುಭವವಿದೆ.